काठमाडौं । कृषि, वन तथा वातावरण मन्त्रालयले आगामी साउन महिनाभित्र करिब २ लाख १० हजार मेट्रिक टन रासायनिक मल नेपाल भित्र्याउने तयारी गरेको छ। किसानलाई समयमै मल उपलब्ध गराउने उद्देश्यले मन्त्रालयले विभिन्न माध्यमबाट आयात प्रक्रिया तीव्र बनाएको जनाएको छ।
मन्त्रालयका अनुसार सरकार–सरकार (जीटूजी) सम्झौताअन्तर्गत भारतबाट ३० हजार मेट्रिक टन युरिया मल आयात गरिँदैछ। उक्त मल असार अन्तिमदेखि साउन दोस्रो साताभित्र नेपाल आइपुग्ने अपेक्षा गरिएको छ।
भारतसँग भएको ८० हजार मेट्रिक टन मल आपूर्ति सम्झौता अनुसार पहिलो चरणमा ५० हजार मेट्रिक टन मल साउन दोस्रो सातासम्म नेपाल भित्रिने मन्त्रालयले जनाएको छ।
यस्तै, अन्तर्राष्ट्रिय (ग्लोबल) टेन्डर मार्फत १ लाख ८० हजार मेट्रिक टन रासायनिक मल आयात गर्ने प्रक्रिया अघि बढाइएको छ। यसमध्ये ६० हजार मेट्रिक टन डीएपी र १ लाख २० हजार मेट्रिक टन युरिया रहेको छ। यी मल साउनको पहिलो सातासम्म नेपाल भित्र्याउने लक्ष्य राखिएको छ।
मन्त्रालयका अनुसार ओमनबाट ल्याइँदै गरेको ३० हजार मेट्रिक टन युरिया मल हाल लोडिङ प्रक्रियामा रहेको छ। यो मल असार अन्तिमसम्म कलकत्ता बन्दरगाह पुग्ने र साउन दोस्रो सातासम्म नेपाल आइपुग्नेछ।
साल्ट ट्रेडिङ कर्पोरेसन लिमिटेडका अनुसार ३० हजार मेट्रिक टन डीएपी मल होर्मुज पार गरी भिसाखापट्टनम बन्दरगाह पुगिसकेको छ। उक्त मल असार १९–२० गतेसम्म नेपाल भित्रिने अपेक्षा गरिएको छ।
त्यसैगरी, ३० हजार मेट्रिक टन युरिया मल जहाजमा लोड भइसकेको छ। यो मल साउनको पहिलो साता कलकत्ता बन्दरगाह पुग्ने र साउन अन्तिमसम्म नेपाल आइपुग्नेछ।
कृषि सामग्री कम्पनी लिमिटेडका अनुसार कतारबाट ३० हजार मेट्रिक टन युरिया मल ढुवानी भइसकेको छ। उक्त मल असार अन्तिम सातामा कलकत्ता पुग्नेछ। साथै, साउदी अरेबियाबाट ३० हजार मेट्रिक टन युरिया पनि लोड भइसकेको छ र असार अन्तिम सातासम्म कलकत्ता आइपुग्ने जनाइएको छ।
यस्तै, भियतनामबाट ३० हजार मेट्रिक टन डीएपी मल पनि लोड भइसकेको छ। उक्त मल असार अन्तिम सातासम्म कलकत्ता पुग्ने र साउन दोस्रो साताभित्र नेपाल भित्रिने मन्त्रालयले जनाएको छ।
