काभ्रेपलाञ्चोक। बीपी राजमार्ग अन्तर्गत काभ्रेको कटुन्जेबेँसी–नेपालथोक सडकखण्डमा यात्रा गर्दा उच्च सावधानी अपनाउन जिल्ला प्रशासन कार्यालय काभ्रेपलाञ्चोकले सूचना जारी गरेको छ।
गत वर्षको बाढीका कारण क्षतिग्रस्त भई हाल निर्माण तथा स्तरोन्नतिको चरणमा रहेको उक्त सडकखण्डमा सामान्य वर्षात्कै समयमा पनि सडक अवरुद्ध हुने समस्या दोहोरिँदै आएको प्रशासनले जनाएको छ। विशेषगरी रोशी खोला मा आउने बाढीका कारण सवारीसाधन र यात्रु उच्च जोखिममा पर्ने अवस्था रहेको उल्लेख गरिएको छ।
प्रशासनका अनुसार २०८३ वैशाख २२ गते रोशी गाउँपालिका–७ स्थित घुमाउने क्षेत्रमा आएको बेलबाढीका कारण सवारीसाधन फस्दा ८९ जनाको ज्यान जोखिममा परेको घटनाले जोखिम थप स्पष्ट बनाएको छ। साथै राष्ट्रिय विपद् जोखिम न्यूनीकरण तथा व्यवस्थापन प्राधिकरण को निर्देशनलाई मध्यनजर गर्दै काभ्रेपलाञ्चोक र सिन्धुलीका प्रमुख जिल्ला अधिकारीबीच समन्वय गरिएको जनाइएको छ।
जिल्ला सुरक्षा समिति काभ्रेपलाञ्चोकको निर्णयअनुसार आजदेखि अर्को सूचना जारी नभएसम्म खुर्कोट–भकुण्डेबेँसी सडकखण्डमा बेलुकी ५ बजेदेखि बिहान ५ बजेसम्म सवारी आवागमन पूर्ण रूपमा बन्द गरिएको छ। मौसम तथा बाढीको अवस्थाअनुसार आवश्यक परे अन्य समयमा पनि अस्थायी रूपमा आवागमन रोक्न सकिने प्रशासनले जनाएको छ।
यात्रुहरूलाई उक्त सडक प्रयोग गर्नु अघि नजिकको प्रहरी कार्यालय वा जिल्ला आपत्कालीन कार्य सञ्चालन केन्द्रमार्फत सडकको अवस्था बुझेर मात्र यात्रा गर्न प्रशासनले अनुरोध गरेको छ।
