काठमाडौं । श्रम संस्कृति पार्टीका अध्यक्ष हर्क साम्पाङ ले उपसभामुखका कामकारबाहीमा पार्टीको कुनै हस्तक्षेप नहुने स्पष्ट पारेका छन् ।
संवैधानिक परिषद्ले वरीयता मिच्दै प्रधानन्यायाधीश नियुक्ति सिफारिस गरेको विषयमा असन्तुष्टि जनाउँदै विज्ञप्ति जारी गरेका साम्पाङले पछि यस्तो धारणा सार्वजनिक गरेका हुन् ।
उपसभामुख रूबीकुमारी ठाकुर ले पार्टीबाट राजीनामा दिई उपसभामुख बनेकाले अब उहाँको कामकारबाहीमा पार्टीको कुनै दख्खल नहुने साम्पाङको भनाइ छ ।
“उहाँ हाम्रो पार्टीबाट राजीनामा दिएर उपसभामुख बन्नुभएको हो। शपथपछि उहाँ पार्टीको सदस्य रहनुहुन्न। उहाँले के गर्नुहुन्छ भन्ने विषयमा हाम्रो पार्टीको कुनै हस्तक्षेप हुँदैन,” उनले भने ।
साम्पाङले प्रधानन्यायाधीश नियुक्ति सिफारिस प्रक्रियाप्रति असन्तुष्टि जनाउँदै पहिले नै विज्ञप्ति जारी गरेका थिए ।
संवैधानिक परिषद्ले बिहीबार चौथो वरीयतामा रहेका मनोज शर्मालाई प्रधानन्यायाधीश नियुक्तिका लागि सिफारिस गरेको थियो । उक्त प्रक्रियामा प्रधानमन्त्री बालेन्द्र शाहले धारणा माग गर्दा उपसभामुख ठाकुर मौन रहेकी थिइन् ।
सिफारिसमा राष्ट्रिय सभाध्यक्ष नारायणप्रसाद दाहाल र विपक्षी दलका नेता भीष्म आङ्दाम्बेले लिखित असहमति जनाएका थिए ।
