खोटाङ, असार १८। वैदेशिक रोजगारीका क्रममा दक्षिण कोरियामा मृत्यु भएका खोटेहाङ गाउँपालिका–१, लिकुवापोखरीका धर्मराज तामाङको परिवारले आर्थिक सहायता र बीमाबापत कुल २३ लाख रुपैयाँ प्राप्त गरेको छ।
खोटेहाङ गाउँपालिका अन्तर्गतको आप्रवासी स्रोत उपकेन्द्रका परामर्शकर्ता युवराज कालिकोटेका अनुसार परिवारले वैदेशिक रोजगार बोर्डबाट आर्थिक सहायताबापत १० लाख रुपैयाँ र बीमाबापत १३ लाख रुपैयाँ प्राप्त गरेको हो।
धर्मराज २०८० मंसिर २६ गते वैदेशिक रोजगारीका लागि दक्षिण कोरिया गएका थिए। २०८२ मंसिर २२ गते उनी मृत अवस्थामा फेला परेका थिए। आफन्तका अनुसार उनी झुण्डिएको अवस्थामा भेटिएका थिए।
मृतकका परिवारले २०८२ पुस २४ गते आर्थिक सहायता तथा बीमाको रकम प्राप्त गर्न आप्रवासी स्रोत उपकेन्द्रमा निवेदन दिएका थिए। सोही दिन आवश्यक कागजात तयार गरी वैदेशिक रोजगार बोर्डमा सिफारिस गरिएको थियो। त्यसपछि असार १६ गते मृतकका परिवारको बैंक खातामा २३ लाख रुपैयाँ जम्मा भएको परामर्शकर्ता कालिकोटेले जानकारी दिए।
मृतक धर्मराजका श्रीमती र एक छोरा छन्। छोरालाई नेपाल सरकारको छात्रवृत्ति कार्यक्रमका लागि सिफारिस गर्ने प्रक्रिया अघि बढाइएको छ।
खोटेहाङ गाउँपालिकाका अध्यक्ष उदिमबहादुर राई (मुक्ति)का अनुसार चालु आर्थिक वर्षमा वैदेशिक रोजगारीका क्रममा ज्यान गुमाएका तीन जनाका ६ जना बालबालिकालाई छात्रवृत्तिका लागि सिफारिस गरिसकिएको छ।
सरकारले वैदेशिक रोजगारीका क्रममा अभिभावक गुमाएका ४ देखि १७ वर्ष उमेर समूहका बालबालिकालाई छात्रवृत्ति प्रदान गर्ने व्यवस्था गरेको छ। यसअन्तर्गत कक्षा १ देखि ८ सम्म अध्ययनरत विद्यार्थीले वार्षिक १२ हजार रुपैयाँ र कक्षा ९ देखि १२ सम्म अध्ययनरत विद्यार्थीले वार्षिक १६ हजार रुपैयाँ छात्रवृत्ति पाउने व्यवस्था रहेको छ।
