काठमाडौं। त्रिभुवन अन्तर्राष्ट्रिय विमानस्थल भन्सार सुरक्षा कार्यालयले सुन तथा चाँदीका गरगहनासहित दुई जनालाई नियन्त्रणमा लिएको जनाएको छ।
कार्यालयका अनुसार असार १६ गते बिहान त्रिभुवन अन्तर्राष्ट्रिय विमानस्थलस्थित कार्गो कम्प्लेक्समा Manifest No. AMS AP 321 अन्तर्गत जुत्ता, पाइन्ट, साडी तथा अन्य कपडा रहेको उल्लेख गरिएको कार्गो पार्सलको एक्स–रे परीक्षण गरिएको थियो।
परीक्षणका क्रममा पार्सल शंकास्पद देखिएपछि खोल्दा विभिन्न प्रकारका सुन तथा चाँदीजस्ता देखिने धातुका गरगहना फेला परेको भन्सार सुरक्षा कार्यालयले जनाएको छ।
प्रारम्भिक अनुसन्धानबाट उक्त पार्सल झापास्थित युनिक कार्गो (Unique Cargo) ले एपेक्स लजिस्टिक प्रालि (Apex Logistic Pvt. Ltd.) मार्फत काठमाडौंबाट संयुक्त राज्य अमेरिका पठाउने तयारी गरेको खुलेको छ।
घटनामा संलग्न रहेको आरोपमा एपेक्स लजिस्टिक प्रालिका सञ्चालक ४६ वर्षीय यज्ञराज सुवेदी र युनिक कार्गो, झापाका सञ्चालक ३४ वर्षीय रामप्रसाद दाहाललाई नियन्त्रणमा लिई थप अनुसन्धान तथा आवश्यक कानुनी कारबाहीका लागि त्रिभुवन विमानस्थल भन्सार कार्यालय, गौचरमा बुझाइएको प्रहरीले जनाएको छ।
बरामद गरिएका सामग्रीमा विभिन्न प्रकारका गौँडी, चन्द्रमा, जन्तर, सिंगल तथा डबल ब्रोच, शिरफूल, नेपालको झण्डा अंकित ब्रोच, खुकुरी आकारका ब्रोच, मंगलसूत्र, मोतीमाला, रातोहार, त्रिशूललगायतका गरगहना रहेका छन्।
प्रहरीका अनुसार बरामद गरिएका गरगहनाको वास्तविक धातु, तौल तथा मूल्य निर्धारण गर्ने कार्य जारी रहेको छ भने घटनाबारे थप अनुसन्धान भइरहेको छ।
