काठमाडौं। आफ्ना मागको सम्बोधनका लागि सिंहदरबार घेराउ गर्न माइतीघरबाट अघि बढेका दृष्टिविहीन प्रदर्शनकारीलाई प्रहरीले बीचबाटोमै रोकेको छ।
लामो समयदेखि माइतीघर मण्डलामा धर्नामा बसेका दृष्टिविहीनहरू बिहीबार (असार १८) सिंहदरबारतर्फ मार्चपास गर्ने तयारीमा थिए। तर, प्रहरीले उनीहरूलाई अघि बढ्न नदिई बीचबाटै फर्काएको हो।
आफ्ना मागप्रति सरकारको ध्यानाकर्षण गराउन उनीहरूले सिंहदरबार घेराउको कार्यक्रम घोषणा गरेका थिए। सडकपेटीलाई कार्यक्षेत्र बनाएर स्वरोजगारमूलक पेशा अपनाउँदै आएका दृष्टिविहीनहरूले सरकारले आफ्नो व्यवसाय गर्न अवरोध गरेको आरोप लगाउँदै ११ दिनदेखि निरन्तर धर्ना दिँदै आएका छन्।
उनीहरूको मुख्य मागमा दृष्टिविहीनको सम्मानजनक व्यवस्थापन, योग्यता, क्षमता र अनुभवका आधारमा रोजगारीको सुनिश्चितता, त्यो सम्भव नभएसम्म हाल गर्दै आएको स्वरोजगार तथा सडक संगीतजस्ता पेशालाई निर्बाध रूपमा सञ्चालन गर्न पाउने व्यवस्था तथा सामाजिक सुरक्षा भत्तामा उल्लेखनीय वृद्धि समावेश छन्।
आन्दोलनरत दृष्टिविहीन साधन सुब्बाले माग पूरा नभएसम्म आन्दोलन जारी रहने बताए। उनका अनुसार बुधबार (असार १७) उनीहरूले नेकपा (एमाले)को केन्द्रीय कार्यालय अगाडि पनि धर्ना दिएका थिए। एमालेले आफ्ना मागप्रति ऐक्यबद्धता जनाए पनि धर्ना कार्यक्रम सहज रूपमा सञ्चालन गर्न नदिएको उनले गुनासो गरे।
सुब्बाले आफ्ना माग सम्बोधनका लागि एमालेले आवश्यक पहल गर्ने प्रतिबद्धता व्यक्त गरेको पनि जानकारी दिए।
