काठमाडौं। फिफा विश्वकप २०२६ को राउन्ड अफ ३२ अन्तर्गत अर्जेन्टिनाले केप भर्डेलाई अतिरिक्त समयमा ३–२ ले पराजित गर्दै अन्तिम १६ मा स्थान सुरक्षित गरेको छ।
मियामी स्टेडियममा सम्पन्न रोमाञ्चक प्रतिस्पर्धामा साविक विजेता अर्जेन्टिनाले नवप्रवेशी केप भर्डेमाथि कठिन जित निकाल्दै अघिल्लो चरणमा यात्रा तय गरेको हो।
खेलको २९औँ मिनेटमा कप्तान लियोनल मेसीले गोल गर्दै अर्जेन्टिनालाई सुरुआती अग्रता दिलाएका थिए। तर, ५९औँ मिनेटमा डेरोय डुआर्टेले गोल फर्काउँदै केप भर्डेलाई १–१ को बराबरीमा पुर्याए।
निर्धारित ९० मिनेट १–१ को बराबरीमा सकिएपछि खेल अतिरिक्त समयमा प्रवेश गरेको थियो। अतिरिक्त समयको दोस्रो मिनेटमा लिसान्ड्रो मार्टिनेजले गोल गर्दै अर्जेन्टिनालाई पुनः अग्रता दिलाए।
यद्यपि, त्यसको ११ मिनेटपछि सिड्नी लोप्स क्याब्रलले उत्कृष्ट गोल गर्दै केप भर्डेलाई फेरि २–२ को बराबरीमा ल्याए। खेल पेनाल्टी सुटआउटतर्फ जाने संकेत देखिएको अवस्थामा १११औँ मिनेटमा डाइनी बोर्जेसबाट आत्मघाती गोल भएपछि अर्जेन्टिनाले ३–२ को निर्णायक अग्रता बनायो।
उत्कृष्ट प्रदर्शन गरे पनि केप भर्डे हार टार्न असफल रह्यो। संघर्षपूर्ण जितसँगै अर्जेन्टिनाले अन्तिम १६ मा स्थान बनाएको छ, जहाँ क्वार्टरफाइनल प्रवेशका लागि उसको सामना इजिप्टसँग हुनेछ।
