काठमाडौं । ग्यास बिक्रेता महासंघ र नेपाल ग्यास उद्योगबीच भएको वार्षिक सम्झौताअनुसार सञ्चालन भइरहेको जनचेतनामूलक अभियानअन्तर्गत तेस्रो कार्यक्रम आज काठमाडौंको तारकेश्वर नगरपालिका–६ स्थित सनफ्लावर स्कुलमा भव्य रूपमा सम्पन्न भएको छ।
यसअघि अभियानको पहिलो कार्यक्रम जनकपुरमा र दोस्रो कार्यक्रम कागेश्वरी मनोहरा नगरपालिकास्थित हाइली क्रियटिभ स्कुलमा सम्पन्न भएको थियो। उपभोक्तामाझ सुरक्षित ग्यास प्रयोगसम्बन्धी सचेतना विस्तार गर्ने उद्देश्यका साथ यो अभियान निरन्तर सञ्चालन भइरहेको आयोजकले जनाएको छ।
कार्यक्रम ग्यास बिक्रेता महासंघको आयोजना तथा नेपाल ग्यास उद्योगको प्रायोजन एवं समन्वयमा सम्पन्न भएको हो। देशभरका बढीभन्दा बढी उपभोक्तासम्म सुरक्षित ग्यास प्रयोगसम्बन्धी जानकारी पुर्याउने लक्ष्यसहित अभियानलाई निरन्तरता दिइएको आयोजकले जनाएको छ।
कार्यक्रममा ग्यास बिक्रेता महासंघका वरिष्ठ उपाध्यक्ष विष्णु प्रसाद दुलाल, प्रशिक्षक तथा उपाध्यक्ष गहेन्द्र रिजाल, उपाध्यक्ष राधिका महर्जन, कोषाध्यक्ष रविन कार्की तथा केन्द्रीय सदस्य शेषनाथ भण्डारीको उपस्थिति रहेको थियो। नेपाल ग्यास उद्योगका तर्फबाट मार्केटिङ म्यानेजर बुद्धिगम्भीर पण्डित सहभागी हुनुहुन्थ्यो।
आजको कार्यक्रममा तारकेश्वर क्षेत्रका चार संस्थामा आबद्ध अपाङ्गता भएका आमा–बुवा, दाजुभाइ तथा दिदीबहिनीहरूको सहभागिता रहेको थियो। प्रशिक्षकहरूले ग्यास सुरक्षित रूपमा कसरी प्रयोग गर्ने, ग्यासमा आगलागी भएमा कसरी नियन्त्रण गर्ने, उपयुक्त ग्यास पाइपको छनोट कसरी गर्ने तथा ग्यास चुहावट हुन नदिन अपनाउनुपर्ने सावधानीका विषयमा व्यवहारिक प्रशिक्षण प्रदान गरेका थिए।
सहभागीहरूले कार्यक्रमलाई उपयोगी र प्रभावकारी भएको बताउँदै यस्ता जनचेतनामूलक कार्यक्रमलाई आगामी दिनमा पनि निरन्तर सञ्चालन गर्नुपर्ने आवश्यकता औँल्याएका थिए।
