सुर्खेत। जिल्ला ट्राफिक प्रहरी कार्यालय सुर्खेतले गत आर्थिक वर्ष २०८२/८३ मा ट्राफिक नियम उल्लङ्घन गर्ने सवारीसाधनमाथि कारबाही गर्दै रु १ करोड ३३ लाख ८१ हजार ५०० राजस्व सङ्कलन गरेको जनाएको छ।
कार्यालय प्रमुख प्रहरी निरीक्षक रोहितकुमार शाहीका अनुसार मादक पदार्थ सेवन गरेर सवारी चलाउने, तीव्र गतिमा गुड्ने तथा अन्य ट्राफिक नियम उल्लङ्घन गर्ने चालकलाई कारबाहीको दायरामा ल्याइएको थियो।
त्यसैगरी, सवारीसाधनको स्वरूप आफूखुसी परिवर्तन गर्ने चालकबाट मात्र रु ५ लाख ७० हजार राजस्व सङ्कलन गरिएको उनले जानकारी दिए।
ट्राफिक प्रहरीले गत वर्ष २ लाख ३१ हजार १३७ जनालाई ट्राफिक सचेतना कार्यक्रममा सहभागी गराएको पनि जनाएको छ।
यस अवधिमा सुर्खेत जिल्लामा ९५७ वटा सवारी दुर्घटना भएका छन्। ती दुर्घटनामा ३७ जनाको मृत्यु भएको प्रहरीको तथ्याङ्क छ।
प्रहरीका अनुसार सवारी दुर्घटनाको प्रमुख कारण तीव्र गति रहेको छ। साथै यान्त्रिक खराबी, पैदलयात्रीको लापरबाही, सडक पूर्वाधारको अवस्था, प्रतिकूल मौसम तथा पशुचौपायको उपस्थितिलाई पनि दुर्घटनाका प्रमुख कारणका रूपमा उल्लेख गरिएको छ।
