भक्तपुर। भारतको उत्तराखण्डस्थित प्रसिद्ध केदारनाथ धाम पुग्न सबै भक्तजनका लागि सम्भव नहुने भएकाले नेपालकै ऐतिहासिक तथा धार्मिक महत्व बोकेको डोलेश्वर महादेव मन्दिर भक्तजनका लागि विशेष आस्थाको केन्द्र बनेको छ।
भक्तपुरको सूर्यविनायक नगरपालिका–८, सिपाडोलमा अवस्थित डोलेश्वर महादेवलाई धेरै हिन्दू भक्तजनले केदारनाथसँग जोडिएको धार्मिक परम्पराअनुसार श्रद्धापूर्वक पूजा–आराधना गर्ने गर्दछन्। धार्मिक विश्वासअनुसार केदारनाथसँग सम्बन्धित दिव्य शक्तिको प्रतीकका रूपमा डोलेश्वर महादेवको दर्शन गर्नाले भगवान शिवको विशेष कृपा प्राप्त हुने जनविश्वास रहेको छ।
विशेषगरी श्रावण महिना, सोमबार, महाशिवरात्रि तथा अन्य पर्वहरूमा यहाँ देश–विदेशबाट हजारौँ भक्तजन दर्शन, पूजा, जलाभिषेक र रुद्राभिषेक गर्न आउने गर्छन्। मन्दिर परिसरमा भक्तजनले शान्त वातावरणमा भगवान शिवको आराधना गर्दै आध्यात्मिक आनन्दको अनुभूति गर्ने गरेका छन्।
केदारनाथ धामसम्म पुग्न नसक्ने श्रद्धालुहरूलाई समय मिलाएर डोलेश्वर महादेवको दर्शन गर्न, पूजा–आराधना गर्न र भगवान शिवको आशीर्वाद प्राप्त गर्न स्थानीय पुजारी तथा भक्तजनले आग्रह गरेका छन्।
