मकवानपुर। बागमती प्रदेशअन्तर्गत मकवानपुर जिल्लाको थाहा नगरपालिका–३, पालुङस्थित निर्माणाधीन मोक्षधाममा स्थापना गरिएको १०८ शंखधाराको उद्घाटन परमपूज्य श्री १००८ स्वामी चतुर्भुजाचार्य (चुडामणिजी) महाराजको पावन हस्तबाट भव्य रूपमा सम्पन्न भएको छ।
धार्मिक श्रद्धा, भक्ति र उत्साहका साथ सम्पन्न उद्घाटन समारोहमा थाहा नगरपालिकाका नगरप्रमुख विष्णुबहादुर विष्ट, उपनगरप्रमुख भरत गोपाली, नेपालका कान्छा सांसद प्रशान्त उप्रेती, मोक्ष धाम का अध्यक्ष गुप्त बहादुर कार्की तथा विभिन्न भजन मण्डली, शान्तिधामबाट आएका भक्तजन तथा देशका विभिन्न स्थानबाट आएका उल्लेखनीय श्रद्धालुहरूको उल्लेखनीय सहभागिता रहेको थियो।
कार्यक्रमको शुभारम्भ वैदिक मन्त्रोच्चारण, पूजा–आराधना तथा विशेष धार्मिक विधिअनुसार सम्पन्न गरिएको थियो। त्यसपछि परमपूज्य स्वामी चतुर्भुजाचार्य महाराजले १०८ शंखधाराको विधिवत् उद्घाटन गर्दै मोक्षधामको धार्मिक तथा आध्यात्मिक महत्त्वबारे प्रकाश पार्नुभएको थियो।
उद्घाटन समारोहसँगै आयोजित भजन–कीर्तन, आध्यात्मिक कथा वाचन तथा सायंकालीन आरतीले सम्पूर्ण वातावरणलाई भक्तिमय बनाएको थियो। कार्यक्रममा सहभागी भक्तजनहरूले भगवानको नामस्मरण गर्दै धार्मिक अनुष्ठानमा सक्रिय सहभागिता जनाएका थिए।
मोक्षधाम निर्माण अभियानलाई जनसहभागितामूलक बनाउने उद्देश्यले सञ्चालन गरिएको “एक धारा–एक संकल्प” अभियानअन्तर्गत आर्थिक तथा भौतिक सहयोग गर्ने श्रद्धालु भक्तजनहरूलाई आयोजकले सम्मान–पत्र (प्रमाणपत्र) प्रदान गरी सम्मान गरेको थियो। आयोजकका अनुसार भक्तजनहरूको सहयोग र समर्पणले मोक्षधाम निर्माण कार्यलाई थप गति मिलेको छ।
आयोजकले मोक्षधामलाई भविष्यमा धार्मिक, आध्यात्मिक तथा सांस्कृतिक केन्द्रका रूपमा विकास गर्ने लक्ष्य रहेको जनाएको छ। यहाँ नियमित रूपमा पूजा, सत्संग, कथा, भजन–कीर्तन, आरती तथा अन्य धार्मिक कार्यक्रम सञ्चालन गरिने जानकारी पनि दिइएको छ।
स्थानीयवासी तथा भक्तजनहरूले १०८ शंखधाराको स्थापना र उद्घाटनले थाहा नगरपालिकाको धार्मिक पर्यटन प्रवर्द्धनमा समेत महत्वपूर्ण योगदान पुग्ने विश्वास व्यक्त गरेका छन्। कार्यक्रममा सहभागी श्रद्धालुहरूले यस प्रकारका धार्मिक पूर्वाधार निर्माणले सनातन धर्म, संस्कृति तथा आध्यात्मिक चेतनाको संरक्षण र प्रवर्द्धनमा सकारात्मक भूमिका खेल्ने धारणा राखेका थिए।
“एक धारा–एक संकल्प” अभियानमार्फत निर्माण भइरहेको १०८ शंखधारा आगामी दिनमा मोक्षधामको प्रमुख धार्मिक आकर्षणका रूपमा स्थापित हुने अपेक्षा गरिएको छ। 🙏🕉️
