मकवानपुर — थाहा नगरपालिका–४, थानाबजारमा नगरकै पहिलो फास्ट ईभी चार्जिङ स्टेसन सञ्चालनमा आएको छ। ऋषेश्वर फास्ट चार्जिङ स्टेसन सञ्चालनमा आएसँगै थाहा नगरमा विद्युतीय सवारीसाधनका लागि छिटो चार्जिङ सेवा उपलब्ध भएको हो।
स्टेसनमा CCS2 र GBT दुवै प्रकारका चार्जिङ पोर्ट जडान गरिएको छ। यसबाट विभिन्न मोडलका विद्युतीय सवारीसाधनलाई सहज रूपमा चार्ज गर्न सकिने सञ्चालकले बताएका छन्।
थाहा नगरपालिका पछिल्लो समय पर्यटकीय गन्तव्यका रूपमा विकास हुँदै गएको छ। सोही क्रममा विद्युतीय सवारीसाधनको प्रयोग पनि बढ्दै गएपछि आवश्यक चार्जिङ पूर्वाधारको अभावलाई सम्बोधन गर्न स्टेसन सञ्चालनमा ल्याइएको हो। चार्जिङ सुविधा उपलब्ध भएपछि काठमाडौंलगायत विभिन्न स्थानबाट ईभीमार्फत थाहा नगर भ्रमणमा आउने पर्यटकलाई थप सहज हुने अपेक्षा गरिएको छ।
थाहा नगरपालिका तथा नेपाल विद्युत् प्राधिकरण, पालुङ शाखाको सहयोगमा आवश्यक पूर्वाधार व्यवस्थापन गरी स्टेसन सञ्चालनमा ल्याइएको ऋषेश्वर फास्ट चार्जिङ स्टेसनका सञ्चालक प्रो. देवराज कार्कीले जानकारी दिए।
कार्कीका अनुसार चार्जिङ सेवासँगै स्टेसनमा वासिङ सेन्टर, ग्यारेज र रेस्टुरेन्ट समेत सञ्चालन गर्ने तयारी गरिएको छ। एउटै स्थानबाट विद्युतीय सवारी चार्ज गर्ने, मर्मत तथा सरसफाइ गर्ने र खानाको सुविधा उपलब्ध गराउने उद्देश्य रहेको उनले बताए।
थाहा नगरमा ईभीका लागि आवश्यक पूर्वाधार विस्तार हुनुलाई पर्यटन प्रवर्द्धनका दृष्टिले समेत महत्वपूर्ण मानिएको छ। फास्ट चार्जिङ सुविधा थपिएसँगै विद्युतीय सवारीसाधनमार्फत थाहा नगर आउने पर्यटकको संख्या बढ्ने र नगरलाई ईभीमैत्री पर्यटकीय गन्तव्यका रूपमा विकास गर्न सहयोग पुग्ने अपेक्षा गरिएको छ।
