नयाँ दिल्ली — मठ–मन्दिर तथा सनातन धर्मको संरक्षण र प्रवर्द्धनका विषयमा निरन्तर प्रचार प्रसार गर्दै आएका एक्सप्रेस टिभी न्युज नेपालका प्रबन्ध निर्देशक वरिष्ठ पत्रकार कुमार भट्टराईलाई अन्तर्राष्ट्रिय समरसता मञ्चले प्रथम ‘राजीव गान्धी गौरव रत्न अवार्ड–२०२६’ प्रदान गरेको छ।
नयाँ दिल्लीमा आयोजित विशेष समारोहबीच भट्टराईलाई उक्त सम्मान प्रदान गरिएको हो। विभिन्न स्थानमा रहेका ऐतिहासिक तथा धार्मिक मठ–मन्दिरको खोज, अध्ययन र प्रचार–प्रसार गर्दै सनातन धर्म तथा धार्मिक सम्पदाको संरक्षणका विषयलाई सञ्चारमाध्यममार्फत निरन्तर उठाउँदै आएको योगदानको कदरस्वरूप अवार्ड प्रदान गरिएको आयोजकले जनाएको छ।
पत्रकारितामार्फत धार्मिक तथा सांस्कृतिक सम्पदाको उजागर गर्दै आएको र आफ्नो जिम्मेवारीलाई इमान्दारीपूर्वक निर्वाह गरेको योगदानलाई मध्यनजर गर्दै अन्तर्राष्ट्रिय समरसता मञ्चले भट्टराईलाई सम्मान गरेको हो।
अवार्ड वितरण समारोहमा विभिन्न क्षेत्रका व्यक्तित्व तथा अतिथिहरूको उल्लेख्य उपस्थिति रहेको थियो। सम्मान ग्रहण गर्दै भट्टराईले आफूले गर्दै आएको पत्रकारिता र धार्मिक–सांस्कृतिक सम्पदाको संरक्षणसम्बन्धी अभियानलाई अझ प्रभावकारी रूपमा निरन्तरता दिने प्रतिबद्धता व्यक्त गरे।
