रसुवाको गोसाईंकुण्ड गाउँपालिका–२, टिमुरेमा बाढी–पहिरो गएको दोस्रो दिन सशस्त्र प्रहरी बल (APF) को उद्धार टोलीले माटोमुनि पुरिएकी करिब ६ वर्षीया बालिकालाई जीवितै उद्धार गरेको छ।
शुक्रबार साँझ करिब ६ः१५ बजे टिमुरे क्षेत्रमा खोज तथा उद्धारमा खटिएको सशस्त्र प्रहरीको टोलीले माटोमुनिबाट बालिका रोइरहेको आवाज सुनेपछि तत्कालै त्यसतर्फ खोजी अघि बढाएको थियो। केहीबेरको प्रयासपछि माटोले पुरिएको अवस्थामा बालिकालाई फेला पारेर उद्धार गरिएको हो।
सीमा सुरक्षा चौकी (BOP) टिमुरेबाट सप्रनिको कमान्डमा परिचालित ६ सदस्यीय टोलीले बालिकालाई उद्धार गरी चौकीमा ल्याएको जनाइएको छ। उद्धारका क्रममा बालिका निकै कमजोर तथा अचेत अवस्थामा फेला परेकी थिइन्।
चौकीमा ल्याएपछि उनलाई न्यानो बनाएर प्राथमिक हेरचाह गरिएको छ। अवस्था गम्भीर रहेकाले थप उपचारका लागि हेलिकप्टरमार्फत उद्धार गर्ने पहल भइरहेको जनाइएको छ। यद्यपि, रातिको समय भएकाले तत्काल हेलिकप्टर उडान सम्भव हुन नसकेको बताइएको छ।
माटोमुनिबाट आएको बालिकाको आवाज समयमै सुनेर उद्धार गर्न सफल हुनुले विपद्का बेला सुरक्षाकर्मीको सतर्कता, धैर्यता र निरन्तर खोजी कार्यको महत्त्वलाई थप उजागर गरेको छ।
बाढी–पहिरोबाट प्रभावित टिमुरे क्षेत्रमा सुरक्षाकर्मीहरूले जोखिमका बीच खोज, उद्धार तथा राहत कार्यलाई निरन्तरता दिइरहेका छन्।
