काठमाडौँबाट राहत सामग्री आफैँ लिएर नुवाकोट पुगेका शिव शक्ति बाबाद्वारा खाद्यान्न तथा नगद सहयोग
नुवाकोटमा बाढीबाट प्रभावित नागरिकहरूलाई राहत पुर्याउने उद्देश्यले श्री श्री श्री महागुरु दिव्य सिद्धि पुरुष जगद्गुरु महाराज शिव शक्ति बाबाले १ लाख ८० हजार रुपैयाँ को राहत सामग्री सहयोग गर्नुभएको छ।
भदौ १५ गते काठमाडौँबाट राहत सामग्री आफैँ लोड गरी शिव शक्ति बाबा नुवाकोटको विदुर नगरपालिका पुग्नुभएको थियो। उहाँले बाढी प्रभावित परिवारहरूलाई खाद्यान्न सामग्रीसहित नगद सहयोगसमेत वितरण गर्नुभएको हो।
शिव शक्ति बाबाले उपलब्ध गराउनुभएको राहतमा ५० बोरा चामल, चिउरा, भुजा, दालबुट, भुजिया, फुरुती, रेडबुल, पानीलगायत विभिन्न खाद्यान्न तथा आवश्यक सामग्री रहेका थिए। उक्त खाद्यान्न तथा अन्य राहत सामग्रीको मूल्य करिब १ लाख ५० हजार रुपैयाँ रहेको बताइएको छ।
त्यसैगरी, राहत सामग्री प्रभावित क्षेत्रमा पुर्याउन गाडी भाडाबापत २० हजार रुपैयाँ खर्च गरिएको थियो। बाढीबाट प्रभावित १० जना नागरिकलाई व्यक्तिगत रूपमा प्रतिव्यक्ति १ हजार रुपैयाँका दरले १० हजार रुपैयाँ नगद समेत वितरण गरिएको थियो।
राहत अभियानमा थाहा नगरपालिकाका तरकारी व्यवसायीहरूले समेत विभिन्न प्रकारका तरकारी पठाएर सहयोग गरेका थिए। थाहा नगरपालिकाबाट उपप्रमुख भरत गोपाली, कविन अमात्य र रामकृष्ण दियाली लगायतको उपस्थिति रहेको थियो।
त्यस्तै, बाढीपीडितहरूको सहयोगका लागि धादिङबाट इन्जिनियर कपिल भण्डारी पनि राहत अभियानमा सहभागी हुनुभएको थियो। यसै क्रममा एसएस कुर्ता कलेक्सनकी सृजना दिदीले करिब २ लाख रुपैयाँ बराबरका कुर्ता–सुरुवाल तथा अन्य कपडा सहयोगस्वरूप पठाउनुभएको थियो।
विपद्को कठिन समयमा विभिन्न व्यक्ति, व्यवसायी तथा संस्थाबाट प्राप्त सहयोगले बाढी प्रभावित नागरिकलाई ठूलो राहत पुगेको छ। राहत सामग्री तथा नगद सहयोग प्राप्त गरेपछि प्रभावित नागरिकहरूले खुसी व्यक्त गर्दै सहयोगी सबैप्रति आभारसमेत प्रकट गरेका छन्।
बाढीका कारण समस्यामा परेका नागरिकलाई प्रत्यक्ष रूपमा राहत पुर्याउँदै मानवीय सेवामा जुट्नुभएका शिव शक्ति बाबा तथा सम्पूर्ण सहयोगी हातहरूको यो पहलले विपद्को समयमा आपसी सहयोग, सद्भाव र मानवीयताको महत्वपूर्ण सन्देश दिएको छ।
