काठमाडौं । सीमापार भारतीय भूमिमा सञ्चालन भइरहेको नेपाली नक्कली नोट छाप्ने अत्याधुनिक कारखानामा छापा मारिएको छ। भारतमा नक्कली नोट छपाई गरी नेपालमा पैठारी गर्ने कार्यमा संलग्न अन्तर्राष्ट्रिय गिरोहका तीन नेपाली नागरिकसहित १० जनालाई भारतीय सुरक्षाकर्मीले पक्राउ गरेका छन्।
भारतीय प्रहरीका अनुसार बिहार राज्यको सीतामढी जिल्लाअन्तर्गत मेजरगञ्ज क्षेत्रमा पूर्वी चम्पारण प्रहरी र **स्पेशल टास्क फोर्स (एसटीएफ)**को संयुक्त कारबाहीमा नक्कली नोट छाप्ने कारखाना फेला पारेर नष्ट गरिएको हो।
छापाका क्रममा प्रहरीले करिब २५ लाख रुपैयाँ बराबरका नेपाली नक्कली नोट, १ लाख ४० हजार सक्कली नेपाली रुपैयाँ, १ हजार ८५० नक्कली भारतीय नोट, हाइटेक प्रिन्टिङ मेसिन, नोट छाप्न प्रयोग हुने २२ बण्डल विशेष कागज, रसायन तथा अन्य सामग्री बरामद गरेको बिहार प्रहरीले जनाएको छ। नक्कली नोट ओसारपसारमा प्रयोग हुने तीन वटा मोटरसाइकल र एक कार समेत नियन्त्रणमा लिइएको छ।
पक्राउ परेका व्यक्तिहरूलाई हिरासतमा राखेर विस्तृत सोधपुछ भइरहेको र गिरोहका अन्य सदस्य तथा मुख्य योजनाकारको पहिचान खुलाउने काम तीव्र बनाइएको भारतीय सुरक्षा स्रोतले जनाएको छ। पक्राउ परेकाहरूको नाम भने हालसम्म सार्वजनिक गरिएको छैन।
प्रारम्भिक अनुसन्धानका अनुसार उक्त गिरोहले खुला नेपाल–भारत सिमानाको फाइदा उठाउँदै निर्वाचनको समयलाई लक्षित गरी नेपालमा नक्कली नोट तस्करी गर्ने योजना बनाएको देखिएको छ। आसन्न प्रतिनिधि सभा निर्वाचनमा पैसाको चलखेलमार्फत प्रभाव पार्ने उद्देश्यले नक्कली नोट छपाइ गरिएको हुन सक्ने आशंका गरिएको छ।
निर्वाचन जस्तो संवेदनशील समयमा आर्थिक अराजकता सिर्जना गर्ने र राजनीतिक गतिविधिमा हस्तक्षेप गर्ने नियोजित प्रयास हुन सक्ने भारतीय प्रहरीको निष्कर्ष छ। यस कारण नक्कली नोटको कारोबारलाई राष्ट्रिय सुरक्षा, आर्थिक स्थायित्व र निर्वाचन प्रक्रियामाथिको गम्भीर खतराका रूपमा लिँदै घटनालाई उच्च प्राथमिकतामा राखिएको जनाइएको छ।
यसैबीच, मधेश प्रदेशका सर्लाही, महोत्तरी र रौतहटलगायत सीमावर्ती क्षेत्रबाट पुरुष, महिला र बालबालिकासमेत प्रयोग गरी नक्कली नेपाली तथा भारतीय नोट नेपालतर्फ तस्करी गर्ने गतिविधि बढ्दै गएको बताइएको छ। यसले नेपाली सुरक्षाकर्मीलाई सीमामा निगरानी र चेकजाँच कडा बनाउन थप चुनौती थपिएको छ।
नक्कली नोट तस्करीलाई पर्याप्त प्राथमिकता नदिँदा यस्ता आपराधिक गतिविधि नियन्त्रण र अनुगमन गर्न कठिनाइ बढ्दै गएको सुरक्षासम्बन्धी जानकारहरूको भनाइ छ।
