राष्ट्रिय प्रजातन्त्र पार्टीद्वारा धादिङ क्षेत्र नम्बर–२ मा प्रत्यक्ष उम्मेदवार परिचय कार्यक्रम सम्पन्न
धादिङ । राष्ट्रिय प्रजातन्त्र पार्टी (राप्रपा) धादिङ क्षेत्र नम्बर–२ द्वारा प्रत्यक्षतर्फका उम्मेदवार परिचय कार्यक्रम भव्य रूपमा सम्पन्न गरिएको छ। पार्टीको आयोजनामा सम्पन्न उक्त कार्यक्रममा पार्टीका शीर्ष नेता, उम्मेदवार तथा सयौँ कार्यकर्ताहरूको उल्लेखनीय उपस्थिति रहेको थियो।
कार्यक्रममा राप्रपाका नेता बुद्धमान तामाङ, धादिङ क्षेत्र नम्बर २ (ख)प्रदेश सांसद डम्बर तामाङ पूर्व सांसद बिना लामा, खेलकुद विभाग प्रमुख धुर्वविक्रम मल्ल, धादिङ क्षेत्र नम्बर–२ का प्रत्यक्ष उम्मेदवार सुरेश रिजाल, समानुपातिक उम्मेदवार सरस्वती लामा ह्योल्मो लगायतका नेता तथा कार्यकर्ताहरूको सक्रिय सहभागिता रहेको थियो। उपस्थित नेताहरूले पार्टीको विचार, सिद्धान्त र आगामी निर्वाचनका लक्ष्यबारे स्पष्ट धारणा राख्दै कार्यकर्ताहरूलाई उत्साह र प्रेरणा प्रदान गरेका थिए।
कार्यक्रमलाई सम्बोधन गर्दै वक्ताहरूले धादिङ क्षेत्र नम्बर–२ मा राष्ट्रिय प्रजातन्त्र पार्टीको जित सुनिश्चित हुने विश्वास व्यक्त गरे। उनीहरूले जनताको विश्वास, साथ र समर्थनका आधारमा आगामी निर्वाचनमा विजय हासिल गरी सुशासन स्थापना गर्ने, क्षेत्रको समग्र विकासलाई तीव्रता दिने तथा जनताको अपेक्षाअनुसार काम गर्ने प्रतिबद्धता व्यक्त गरे।
यसका साथै वक्ताहरूले देशको मौलिक पहिचान, धर्म, संस्कृति र परम्पराको संरक्षणमा राप्रपा सधैं अग्रसर रहेको उल्लेख गर्दै सनातन धर्म तथा हिन्दु राष्ट्रको पहिचान कायम गर्ने विषयलाई पार्टीको प्रमुख एजेन्डाका रूपमा अघि बढाइएको बताए। उनीहरूले देशमा स्थायित्व, समृद्धि र राष्ट्रिय एकताको लागि राजसंस्था पुनःस्थापना आवश्यक रहेको धारणा समेत व्यक्त गरेका थिए।
कार्यक्रममा सहभागी नेता तथा कार्यकर्ताहरूले पार्टीप्रति आफ्नो पूर्ण समर्थन र प्रतिबद्धता जनाउँदै आगामी निर्वाचनमा एकताबद्ध भएर सक्रिय रूपमा लाग्ने संकल्प व्यक्त गरेका थिए। कार्यक्रम उत्साहपूर्ण वातावरणमा सम्पन्न भएको थियो भने सहभागीहरूको उल्लेखनीय उपस्थितिले धादिङमा राप्रपाको संगठन बलियो बन्दै गएको सन्देश दिएको छ।
राष्ट्रिय प्रजातन्त्र पार्टीले आगामी निर्वाचनलाई लक्षित गर्दै देशभर आफ्नो संगठन विस्तार, जनसम्पर्क सुदृढीकरण तथा उम्मेदवार परिचय कार्यक्रमलाई तीव्रता दिइरहेको छ। धादिङ क्षेत्र नम्बर–२ मा सम्पन्न उक्त कार्यक्रमले पार्टीका कार्यकर्ता तथा समर्थकहरूमा नयाँ ऊर्जा र उत्साह थपिएको विश्वास गरिएको छ।
