आईसीसी टी–२० विश्वकपअन्तर्गत आज मंगलबार तीन खेल आयोजना हुँदैछन्। समूह ‘ए’का दुई र समूह ‘डी’को एक खेल हुने तालिका रहेको छ।
पहिलो खेलमा नेदरल्यान्ड्स र नामिबिया बिहान ११ बजे आमनेसामने हुनेछन्। नामिबियाले प्रतियोगितामा आजबाट आफ्नो यात्रा शुरू गर्दैछ भने नेदरल्यान्ड्स पहिलो खेलमा पाकिस्तानसँग तीन विकेटले पराजित भएपछि पुनरागमनको प्रयासमा रहेको छ।
दोस्रो खेलमा न्युजिल्यान्ड र यूएईबीच प्रतिस्पर्धा हुनेछ। दिउँसो ३:१५ बजे शुरू हुने उक्त खेलमा न्युजिल्यान्ड लगातार दोस्रो जितको लक्ष्यसहित मैदान उत्रनेछ। न्युजिल्यान्डले आफ्नो पहिलो खेलमा अफगानिस्तानलाई पाँच विकेटले पराजित गरेको थियो। यूएई भने प्रतियोगिताको पहिलो खेल खेल्दैछ।
आजको अन्तिम खेलमा पाकिस्तान र अमेरिका साँझ ७:१५ बजे भिड्नेछन्। पहिलो खेलमा भारतसँग २९ रनले पराजित भएको अमेरिका पहिलो जितको खोजीमा रहेको छ। पाकिस्तान भने नेदरल्यान्ड्सलाई तीन विकेटले हराउँदै उत्साहित बनेको छ र लगातार दोस्रो जित निकाल्ने लक्ष्यमा हुनेछ।
आजका तीनै खेलले समूह चरणको समीकरण थप रोचक बनाउने अपेक्षा गरिएको छ।
