काठमाडौँ । होटल फरेस्ट इन लिमिटेडको आईपीओमा लगानीकर्ताको उच्च आकर्षण देखिएको छ। कम्पनीले निष्काशन गरेको शेयरमा मागभन्दा झन्डै ८ गुणा बढी आवेदन परेको हो।
कम्पनीले प्रतिकित्ता १०० रुपैयाँ अंकित मूल्यका ३३ लाख २० हजार कित्ता शेयरका लागि आवेदन खुलाएकोमा अन्तिम दिनसम्म २५ लाख ४५ हजार ७३० जना आवेदकबाट २ करोड ८६ लाख ९३ हजार २६० कित्ता शेयरका लागि आवेदन परेको छ। यसमार्फत कुल २ अर्ब ८६ करोड ९३ लाख २६ हजार रुपैयाँ बराबरको आवेदन संकलन भएको छ।
धितोपत्र बोर्डको न्यूनतम १० कित्ता शेयर बाँडफाँड नीतिअनुसार करिब ३ लाख ३२ हजार लगानीकर्ताले मात्र शेयर पाउनेछन् भने बाँकी २२ लाखभन्दा बढी आवेदकको हात खाली रहनेछ।
कम्पनीको जारी पूँजी २ अर्ब रुपैयाँ रहेको छ, जसको २० प्रतिशत अर्थात् ४० लाख कित्ता शेयर सर्वसाधारणका लागि छुट्याइएको छ। यसमध्ये ४ लाख कित्ता शेयर यसअघि नै विदेशमा रहेका नेपाली नागरिकलाई वितरण गरिसकिएको छ। आईपीओको निष्काशन तथा बिक्री प्रबन्धक एनआईसी एसिया क्यापिटल रहेको छ।
