काठमाडौं । नेपाली कम्युनिष्ट पार्टी (नेकपा) ले आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै आफ्नो प्रतिबद्धता पत्र सार्वजनिक गरेको छ। ‘तारा’ चुनाव चिन्ह लिएर निर्वाचनमा होमिएको पार्टीले आर्थिक समृद्धि, सुशासन र सामाजिक न्यायलाई मुख्य प्राथमिकतामा राखेको जनाएको छ।
पार्टीले आगामी ५ वर्षभित्र १० प्रतिशतभन्दा माथिको आर्थिक वृद्धि हासिल गर्ने, प्रतिवर्ष ५ लाख रोजगारी सिर्जना गर्ने र गरिबी दर उल्लेख्य रूपमा घटाउने लक्ष्य अघि सारेको छ। भ्रष्टाचार नियन्त्रणका लागि उच्चस्तरीय सम्पत्ति छानबिन आयोग गठन गर्ने, डिजिटल प्रशासन लागू गर्ने र सुशासन सुनिश्चित गर्ने प्रतिबद्धता पनि गरिएको छ।
यसका साथै, कृषि क्षेत्रमा आत्मनिर्भरता हासिल गर्ने, भूमिहीनलाई लालपुर्जा वितरण गर्ने, स्वास्थ्य सेवा नि:शुल्क बनाउने, ‘एक पालिका–एक स्मार्ट विद्यालय’ लागू गर्ने तथा ऊर्जा, पूर्वाधार र पर्यटन क्षेत्रमा व्यापक लगानी गर्ने योजना पार्टीले सार्वजनिक गरेको छ।
नेकपाले राजनीतिक स्थिरता, संविधानअनुसार समावेशिता र राष्ट्रिय हितको रक्षा गर्दै समृद्ध नेपाल निर्माण गर्ने आफ्नो प्रमुख लक्ष्य रहेको उल्लेख गरेको छ।
