सल्यानमा पिकअप जिप भीरबाट झन्डै साढे दुई सय मिटर तल खस्दा चालकको घटनास्थलमै मृत्यु भएको छ।
बुधबार बिहान करिब ५:३० बजे कपुरकोट गाउँपालिका–३ चोरखोला नजिक ग १ ज ५६६१ नम्बरको जिप दुर्घटनामा परेको हो। जिप रुकुम पूर्वबाट राप्ती लोकमार्ग हुँदै दाङको तुलसीपुरतर्फ जाँदै थियो।
दुर्घटनामा जिप चालक रुकुम पूर्वको सिस्ने गाउँपालिका–४ अमलाचौरका ३० वर्षीय विजय विश्वकर्माको घटनास्थलमै मृत्यु भएको जिल्ला प्रहरी कार्यालय सल्यानका प्रवक्ता इन्स्पेक्टर देवराज भट्टराईले जानकारी दिए।
दुर्घटनामा परी सिस्ने गाउँपालिका–४ की ३८ वर्षीया ललिता केसी, सिस्ने–२ की २२ वर्षीया सुष्मी रोका र उनकी २ वर्षीया छोरी सफलता केसी घाइते भएका छन्। घाइतेमध्ये ललिताको अवस्था मध्यम तथा आमा–छोरीको अवस्था सामान्य रहेको प्रहरीले जनाएको छ।
घाइते सबैलाई कपुरकोटमा प्रारम्भिक उपचारपछि थप उपचारका लागि दाङको तुलसीपुरस्थित राप्ती प्रादेशिक अस्पताल पठाइएको छ।
प्रहरीका अनुसार दुर्घटनाको बेला आमा र छोरी सडकतर्फ हुत्तिएर जोगिएका थिए भने चालक गाडीसँगै तल खसेका थिए। चालक निदाएको कारण दुर्घटना भएको हुन सक्ने प्रारम्भिक अनुमान गरिएको छ भने घटनाबारे थप अनुसन्धान भइरहेको प्रहरीले जनाएको छ।
