सर्वोच्च अदालतले सवारीसाधनमा अंग्रेजी भाषामा इम्बोस्ड नम्बर प्लेट बनाउने र जडान गर्ने कार्य तत्कालका लागि रोक्न अन्तरिम आदेश जारी गरेको छ। न्यायाधीशद्वय कुमार रेग्मी र महेश शर्मा पौडेलको संयुक्त इजलासले माघ २५ गते सुनुवाइ गर्दै यस्तो आदेश दिएको हो।
अदालतले अंग्रेजी भाषामा नम्बर प्लेट जडान गर्ने निर्णय संविधान तथा प्रचलित कानुनी व्यवस्थासँग मेल नखाने देखिएको भन्दै सर्वोच्च अदालत नियमावली, २०७४ को नियम ४९(२)(क) अनुसार कार्यान्वयन नगर्न आदेश दिएको जनाएको छ।
यसअघि भौतिक पूर्वाधार तथा यातायात मन्त्रालयअन्तर्गतको विषयगत समितिको निर्णयका आधारमा यातायात व्यवस्था विभागले इम्बोस्ड नम्बर प्लेट अनिवार्य गर्ने सूचना जारी गरेको थियो। सोही निर्णयविरुद्ध अधिवक्ता रामबहादुर राउतसहितले सर्वोच्चमा रिट दायर गरेका थिए।
रिट निवेदकले संविधानको धारा ७ अनुसार सरकारी कामकाजको भाषा देवनागरी लिपिमा लेखिने नेपाली भाषा हुने व्यवस्था रहेको भन्दै अंग्रेजी भाषामा नम्बर प्लेट अनिवार्य गर्नु संविधानविपरीत भएको दाबी गरेका छन्।
हाल सर्वोच्चको अन्तरिम आदेशसँगै अंग्रेजी भाषामा इम्बोस्ड नम्बर प्लेट जडान गर्ने कार्य रोकिएको छ भने यस विषयमा अन्तिम निर्णय भने अदालतको पूर्ण सुनुवाइपछि आउनेछ।
