पोखरामा कार फेवातालमा खस्दा एक युवकको मृत्यु भएको छ। आज बिहान करिब २ः१० बजे पोखरा महानगरपालिका–६ पामेस्थित गैराको चौतरा नजिक विएए १५८२ नम्बरको कार अनियन्त्रित भई तालमा खसेर दुर्घटना भएको हो।
दुर्घटनामा स्याङ्जाको फेदीखोला गाउँपालिका–५ घर भई हाल पोखरा–७ मासबार बस्दै आएका २४ वर्षीय चालक अदित गुरुङको मृत्यु भएको सशस्त्र प्रहरी बल कालिका गणका गणपति सशस्त्र प्रहरी उपरीक्षक वसन्तबहादुर सिंहले जानकारी दिनुभयो।
घटनाको खबर प्राप्त हुनासाथ सशस्त्र प्रहरी उपरीक्षक सिंहको नेतृत्वमा कालिका गणबाट गोताखोरसहित २१ जनाको टोली उद्धारका लागि खटिएको थियो। गोताखोर टोलीले अचेत अवस्थामा चालकलाई तालबाट बाहिर निकाली उपचारका लागि गण्डकी मेडिकल कलेज पुर्याए पनि चिकित्सकले मृत घोषणा गरेका थिए।
दुर्घटनापछि प्रहरीले क्रेनको सहायताले कारलाई तालबाट बाहिर निकालेको छ भने सवारीसाधनलाई थप अनुसन्धानका लागि वडा प्रहरी कार्यालय बैदाममा राखिएको जनाइएको छ।
