एक्सप्रेस टिभी न्युज नेपालको प्रथम वार्षिकोत्सव कार्यक्रम अत्यन्तै भव्य, सभ्य र गरिमामय वातावरणबीच सफलतापूर्वक सम्पन्न भएको छ । छोटो समयमै सञ्चार क्षेत्रमा आफ्नो छुट्टै पहिचान बनाउन सफल एक्सप्रेस टिभी न्युज नेपालको यो ऐतिहासिक अवसर उत्साह, सम्मान र आत्मीयताले भरिएको रह्यो ।
कार्यक्रममा टोखा नगरपालिकाका नगर प्रमुख प्रकाश अधिकारीज्यू प्रमुख अतिथिका रूपमा सहभागी भई कार्यक्रमको गरिमा बढाउनुभयो । त्यसैगरी जय दुर्गे काली सेवा केन्द्रकी अध्यक्ष सपना खड्गी ‘दुर्गे काली माता’, उपाध्यक्ष प्रविन घर्ति मगर गुरुज्यू, श्री मोहनीका महाराजा विनोद कार्की ज्यु, गोविन्द ढुंगाना खत्री ज्यु, सिमान्त केसी गुरु ज्यु, सरू माताज्यू, पूजा माताज्यू, टोखा नगरपालिका–११ का वडा अध्यक्ष घनश्याम खड्गी ज्यु, वडा नम्बर–८ का वडा अध्यक्ष रमेश खत्री ज्यु, वडा सदस्य अनुप राई ज्यु, मिठु नेपाली लगायत विशिष्ट व्यक्तित्वहरूको उल्लेखनीय उपस्थितिले कार्यक्रमलाई थप गरिमामय बनाएको थियो ।
कार्यक्रमस्थलमा उपस्थित सम्पूर्ण अतिथिहरूलाई नेपाली मौलिक संस्कृति झल्काउने पञ्चेबाजाको मधुर धुनसँगै सम्मानपूर्वक स्वागत गरिएको थियो । पञ्चेबाजाको सांगीतिक वातावरणले कार्यक्रममा विशेष उत्साह, अपनत्व र सांस्कृतिक गौरवको अनुभूति गराएको थियो । साथै विभिन्न सञ्चारमाध्यममा आबद्ध पत्रकार, सञ्चारकर्मी तथा मिडियाकर्मीहरूको उल्लेखनीय उपस्थितिले कार्यक्रमलाई थप ऐतिहासिक र प्रेरणादायी बनाएको थियो ।
यस अवसरले एक्सप्रेस टिभी न्युज नेपालले छोटो अवधिमै दर्शक तथा पाठकमाझ स्थापित गरेको विश्वास, माया र समर्थनको स्पष्ट प्रतिबिम्ब प्रस्तुत गरेको छ । कार्यक्रममा बोल्दै संस्थाका अध्यक्ष कुमार भट्टराई ज्युले आगामी दिनहरूमा पनि जनताको आवाजलाई केन्द्रमा राख्दै सत्य, निष्पक्ष र जिम्मेवार पत्रकारितामार्फत समाज र राष्ट्रप्रति आफ्नो दायित्व अझ सशक्त रूपमा निर्वाह गर्ने प्रतिबद्धता व्यक्त गर्नुभयो ।
कार्यक्रम सफल बनाउन प्रत्यक्ष तथा अप्रत्यक्ष रूपमा सहयोग गर्नुहुने सम्पूर्ण अतिथिज्यूहरू, पत्रकार मित्रहरू, सहयोगी, शुभेच्छुक तथा सम्पूर्ण समर्थक महानुभावहरूमा एक्सप्रेस टिभी न्युज नेपाल परिवार हार्दिक धन्यवाद तथा गहिरो कृतज्ञता व्यक्त गर्दछ । यो ऐतिहासिक उपलब्धिले आगामी यात्रामा अझ ऊर्जा, प्रेरणा र जिम्मेवारीका साथ अघि बढ्ने विश्वास दिलाएको छ ।
