इटहरी — नेकपा (एमाले) सुनसरीले इटहरी उपमहानगरपालिका–१७ का वडाध्यक्ष प्रभात आचार्यलाई पार्टीबाट निष्कासन गरेको छ । अन्य राजनीतिक दलबाट उम्मेदवार बनेका आफ्नै छोराको पक्षमा भोट मागेको र पार्टीको आधिकारिक उम्मेदवारविरुद्ध गतिविधि गरेको आरोपमा उनलाई कारबाही गरिएको एमालेले जनाएको छ ।
एमाले सुनसरीका अनुसार आचार्यलाई यसअघि पटक–पटक सचेत गरिए पनि उनले पार्टी अनुशासन र निर्देशनलाई बेवास्ता गर्दै गतिविधि जारी राखेका थिए । पार्टीको नीति, निर्णय र नेतृत्वविरुद्ध गएको ठहर गर्दै उनलाई साधारण सदस्यसमेत नरहने गरी निष्कासन गरिएको हो ।
आचार्य स्थानीय तह निर्वाचनका बेला माओवादी केन्द्र परित्याग गरी एमाले प्रवेश गरेका थिए । एमालेबाट निर्वाचित भई वडाध्यक्ष बनेका उनीमाथि पछिल्लो गतिविधिले पार्टीको अनुशासन उल्लंघन गरेको निष्कर्ष निकालिएको एमालेले जनाएको छ ।
