संघीय राजधानीको प्रतिनिधिसभा क्षेत्र नं. ५ मा आसन्न प्रतिनिधिसभा सदस्य निर्वाचनको माहोल तीव्र बन्दै गएको छ। फागुन २१ गते हुने निर्वाचनका लागि प्रचारप्रसार सुरु भएसँगै यस क्षेत्रमा प्रमुख राजनीतिक दलका प्रभावशाली नेताबीच प्रत्यक्ष प्रतिस्पर्धा देखिएको छ।
यस क्षेत्रमा नेपाली कांग्रेसका महामन्त्री प्रदीप पौडेल, नेकपा (एमाले) का वरिष्ठ नेता ईश्वर पोखरेल, राष्ट्रिय प्रजातन्त्र पार्टीका पूर्वअध्यक्ष कमल थापा, नेपाल कम्युनिष्ट पार्टीकी कल्पना शर्मा तथा राष्ट्रिय स्वतन्त्र पार्टीका सस्मित पोखरेलसहित विभिन्न दल र स्वतन्त्र गरी २४ जनाले उम्मेदवारी दिएका छन्।
२०७९ सालको निर्वाचनमा कांग्रेसका पौडेल १५ हजार २६९ मतसहित विजयी भएका थिए भने एमालेका पोखरेल १० हजार १९० मतसहित निकटतम् प्रतिस्पर्धी बनेका थिए। यसपटक पनि शीर्ष नेताहरू मैदानमा उत्रिएकाले काठमाडौं–५ लाई विशेष चासोका साथ हेरिएको छ।
उम्मेदवारहरूले सुशासन, आर्थिक विकास, शिक्षा–स्वास्थ्य सुधार, पूर्वाधार विस्तार, रोजगारी सिर्जना र सांस्कृतिक संरक्षणलाई मुख्य चुनावी एजेन्डा बनाएका छन्। निर्वाचन आयोगका अनुसार देशभर प्रत्यक्षतर्फ तीन हजारभन्दा बढी उम्मेदवार प्रतिस्पर्धामा छन् भने कुल मतदाता संख्या एक करोड ८९ लाखभन्दा बढी रहेको छ।
