गण्डकी प्रदेशले दोस्रो राष्ट्रिय हक्की प्रतियोगितामा सोमबार पुरुष र महिला दुवै तर्फ जित हात पारेको छ।
त्रिपुरेश्वरस्थित दशरथ रंगशालामा भएको महिलातर्फको खेलमा गण्डकीले बागमती प्रदेशलाई ४–० गोलअन्तरले पराजित गर्यो। गण्डकीकी अंकिता अधिकारीले दुई गोल गर्दै ‘प्लेयर अफ द म्याच’ घोषित भइन् भने गीता पुन मगर र सीतामाया बलले समान एक–एक गोल थपे।
पुरुषतर्फ गण्डकीले कोशी प्रदेशलाई २–० ले हरायो। अशिम बहिकले दुवै गोल गर्दै उत्कृष्ट खेलाडी घोषित भए।
महिलातर्फकै अर्को खेलमा मधेश प्रदेशले कोशीलाई १–० ले पराजित गर्यो। प्रीति दासले निर्णायक गोल गर्दा लक्ष्मनीयाकुमारी दास ‘प्लेयर अफ द म्याच’ बनिन्।
नेपाल हक्की संघको आयोजनामा भइरहेको प्रतियोगिताको उद्घाटन राष्ट्रिय खेलकुद परिषद्का सदस्य–सचिव रामचरित्र मेहताले गरेका थिए। प्रतियोगितामा पुरुषतर्फ ६ र महिलातर्फ ५ टोली सहभागी छन्। शीर्ष तीन स्थान हासिल गर्ने टोलीले क्रमशः ७५ हजार, ५० हजार र २५ हजार रुपैयाँ नगद पुरस्कार प्राप्त गर्नेछन्।
