राष्ट्रिय प्रजातन्त्र दिवस २०८२ का अवसरमा रामचन्द्र पौडेल आज काठमाडौँस्थित सैनिक मञ्च टुँडिखेलमा आयोजित विशेष समारोहमा सहभागी भएका छन्।
राष्ट्रपति पौडेल प्रथम महिला सविता पौडेलसहित राष्ट्रिय प्रजातन्त्र दिवस मूल समारोह समितिद्वारा आयोजित कार्यक्रममा सरिक भएका हुन्। उक्त अवसरमा नेपाली सेनाले राष्ट्रपतिको सम्मानमा सलामी अर्पण गरेको थियो।
समारोहमा नेपालको कला र संस्कृतिको झल्को दिने झाँकी, मार्चपास, नृत्य तथा सांगीतिक प्रस्तुति गरिएको थियो।
कार्यक्रममा रामसहायप्रसाद यादव, सुशीला कार्की, नारायणप्रसाद दाहाललगायत उच्चपदस्थ सरकारी अधिकारी तथा नेपालस्थित विदेशी कूटनीतिक नियोगका प्रमुख एवं प्रतिनिधिहरूको उपस्थिति रहेको थियो।
