मुस्ताङ — चालु आर्थिक वर्षको सात महिनामा मुस्ताङ जिल्लामा कुल ३ लाख २५ हजार ५५८ जना पर्यटक भित्रिएका छन्। जिल्ला प्रहरी कार्यालयका अनुसार साउनदेखि माघसम्म विदेशी ६९ हजार ८१४ र स्वदेशी दुई लाख ५२ हजार ६६४ पर्यटकले मुस्ताङको भ्रमण गरेका हुन्।
प्रहरी तथ्यांकअनुसार राष्ट्रिय गौरवको बेनी–जोमसोम सडकमार्ग हुँदै भित्रिएका पर्यटकमध्ये साउनमा १९ हजार ७८१, भदौमा २३ हजार २०५, असोजमा ७५ हजार ५९९, कात्तिकमा ८३ हजार ७६६, मङ्सिरमा ४९ हजार ५०, पुसमा ३९ हजार १५३ र माघमा ३२ हजार ४ पर्यटक रहेका छन्।
गत वर्ष सोही अवधिमा मुस्ताङ भ्रमण गरेका पर्यटक ३ लाख ४० हजार ७२९ थिए। यस आधारमा चालु वर्षमा १८ हजार १७१ जना अर्थात् ५.३३% कम पर्यटक भित्रिएका छन्।
जिल्ला प्रहरी कार्यालयका प्रहरी निरीक्षक नवराज न्यौपानेका अनुसार म्याग्दी र मुस्ताङको सिमाना घाँसामा, पोखरा–जोमसोम हवाईमार्ग र मनाङ हुँदै थोरङ्लापास मार्गबाट भित्रिने विदेशी तथा स्वदेशी पर्यटकको अभिलेख संकलन गरिएको छ।
मुस्ताङमा आव २०८०/८१ मा ४ लाख ५४ हजार ३२६ र आव २०८१/८२ मा ७ लाख ५ हजार ७७९ जना पर्यटक भित्रिएको तथ्यांकमा उल्लेख छ। पछिल्लो समय बेनी–जोमसोम–कोरला सडकको सहजताका कारण मुस्ताङमा पर्यटक आगमन दर वृद्धि भएको छ।
मुस्ताङमा भित्रिएका सार्क राष्ट्रका पर्यटकमध्ये अधिकांश भारतीय पर्यटक मुक्तिनाथ दर्शन गरी फर्कने गर्छन्। अन्य विदेशी पर्यटक भने बेनी–जोमसोम सडकमार्ग र मनाङ हुँदै थोरङ्लापास क्रस गरेर मुस्ताङ प्रवेश गर्ने गर्छन्।
कागबेनीधाममा पितृ उद्धार र मुक्तिनाथ मन्दिर दर्शनका लागि आउने स्वदेशी पर्यटकको संख्या पनि बढ्दो छ। मुस्ताङमा भित्रिएका पर्यटकमध्ये करिब ३% विदेशीले माथिल्लो मुस्ताङको भ्रमण गर्ने गरेका छन्। हालै सडक सहज भएपछि जोमसोम–कोरला मार्ग हुँदै उल्लेख्य संख्यामा स्वदेशी पर्यटक कोरलानाकासम्म पुग्ने गरेका छन्।
