चितवन — चितवन राष्ट्रिय निकुञ्ज र पर्सा राष्ट्रिय निकुञ्ज सम्मिलित कम्प्लेक्स क्षेत्रमा सञ्चालन गरिएको बाघ गणनाका क्रममा ६० वटा क्यामेरा हराएका छन्।
चितवन राष्ट्रिय निकुञ्जका सूचना अधिकारी अविनास थापा मगरका अनुसार समस्याग्रस्त भएका ८५ क्यामेरामध्ये ६० वटा फेला नपरेका र २५ वटा बिग्रिएका छन्। यस कम्प्लेक्समा कुल १ हजार ७८० क्यामेरा प्रयोग गरिएको थियो।
गत पुस ३ गतेदेखि सुरु गरिएको बाघ गणना बिहीबार सम्पन्न भएको हो। दुई निकुञ्जलाई एउटै कम्प्लेक्सका रूपमा विभाजन गरी तीन ब्लक बनाएर गणना गरिएको थियो। ९५८ वटा ग्रिड निर्धारण गरी प्रत्येक दुई वर्ग किलोमिटर क्षेत्रलाई आधार मानेर क्यामेरा जडान गरिएको बताइएको छ। प्रत्येक ब्लकमा १७ रातसम्म क्यामेरा राखेर तथ्यांक सङ्कलन गरिएको थियो।
यसअघि सन् २०२२ मा गरिएको राष्ट्रिय बाघ गणनाअनुसार नेपालमा ३५५ वटा वयस्क बाघ रहेका थिए। उक्त तथ्यांकअनुसार चितवनमा १२८, बर्दियामा १२५, बाँकेमा २५, पर्सामा ४१ र शुक्लाफाँटामा ३६ वटा बाघ अभिलेख गरिएको थियो।
