रामजी यादव
९ फागुन, वीरगञ्ज (पर्सा)
रोटरी क्लब वीरगञ्ज र रोटरी क्लब मेट्रोपोलिसको संयुक्त आयोजनामा वीरगञ्जमा रक्तदान कार्यक्रम सम्पन्न भएको छ। “रक्तदान नै जीवनदान हो” भन्ने नारासहित आयोजित कार्यक्रममा ३ महिलासहित ४९ जनाले रक्तदान गरेका छन्।
रक्तसञ्चार केन्द्र वीरगञ्जमा रगतको अभाव भएको जानकारी प्राप्त भएपछि सामाजिक उत्तरदायित्व अन्तर्गत छोटो समयमै कार्यक्रम आयोजना गरिएको मेट्रोपोलिसका अध्यक्ष संजय जोशीले बताए। कार्यक्रममा विभिन्न क्षेत्रका युवा, महिला तथा अग्रजहरूको सक्रिय सहभागिता रहेको थियो।
कार्यक्रममा वक्ताहरूले रक्तदानले कसैको ज्यान बचाउन सकिने भएकाले प्रत्येक सक्षम व्यक्तिले नियमित रूपमा रक्तदान गर्नुपर्नेमा जोड दिएका थिए। उनीहरूले रक्तदातालाई मानवताको सच्चा दूतको संज्ञा दिँदै आगामी दिनमा पनि यस्ता मानवीय कार्यक्रमलाई निरन्तरता दिन आग्रह गरेका थिए।
वीरगञ्जस्थित माईस्थान पार्कमा सम्पन्न कार्यक्रममा नेपाल रेडक्रस सोसाइटी पर्सा, नारायणी अस्पताल लगायतका प्रतिनिधिहरूको उपस्थिति रहेको थियो। आयोजकले कार्यक्रम सफल बनाउन सहयोग गर्ने सम्पूर्ण रक्तदाता तथा सहयोगीप्रति आभार व्यक्त गरेका छन्।
