काठमाडौंको तारकेश्वर नगरपालिका–१०, मनमैजुस्थित नसाल चोक नजिक आज दिउँसो चितुवा देखिएपछि स्थानीयवासी त्रसित बनेका छन्। चितुवाको आक्रमणबाट तीन जना घाइते भएका छन्। घाइतेहरूको नजिकैको स्वास्थ्य संस्थामा उपचार भइरहेको जनाइएको छ।
घटनापछि वडा नं. १० का जनप्रतिनिधि विक्रम महर्जन, हातिसार वन डिभिजन कार्यालयबाट खटिएको प्राविधिक टोली, नेपाल प्रहरी तथा स्थानीयवासीको समन्वयमा चितुवालाई साँझ करिब ५:२० बजे नियन्त्रणमा लिई उद्धार गरिएको हो।
उद्धार गरिएको चितुवालाई आवश्यक प्रक्रिया पूरा गरी हातिसार वन डिभिजन कार्यालय लगिएको जानकारी दिइएको छ। घटनापछि क्षेत्रमा सुरक्षाकर्मी परिचालन गरिएको छ भने सर्वसाधारणलाई उच्च सतर्कता अपनाउन आग्रह गरिएको छ।
