निर्वाचनमा मतदाताको अधिकतम सहभागिता सुनिश्चित गर्न सरकारले तीन दिन सार्वजनिक बिदा दिने निर्णय गरेको छ। मंगलबार बसेको मन्त्रिपरिषद् बैठकले निर्वाचन आयोगको सिफारिस स्वीकृत गर्दै उक्त निर्णय गरेको हो।
आयोगले मतदानस्थल टाढा रहेका मतदातालाई आवतजावतमा सहजता होस् भन्ने उद्देश्यले बिदा दिन आग्रह गरेको थियो।
बैठकले राजनीतिक दल, उम्मेदवार र समर्थकलाई शान्तिपूर्ण प्रचार–प्रसार गर्न, आचारसंहिता कडाइका साथ पालना गर्न तथा मतदाताको स्वतन्त्र निर्णयको सम्मान गर्न आह्वान गरेको छ।
निर्वाचन अवधिभर सुरक्षा निगरानी, गस्ती र सूचना संकलनलाई तीव्र पारिने जनाउँदै आवश्यक परे आकस्मिक सुरक्षा बैठक बस्ने सहमति समेत भएको छ।
