शुक्लाफाँटा राष्ट्रिय निकुञ्जमा फागुन २३ गतेदेखि बाघ गणना सुरु गरिने भएको छ। प्रतिनिधिसभा सदस्य निर्वाचनमा निकुञ्जका कर्मचारीसमेत खटिनुपर्ने भएकाले गणना निर्वाचनपछि गर्ने निर्णय गरिएको सूचना अधिकारी पुरुषोत्तम वाग्लेले जानकारी दिए।
राष्ट्रिय बाघ गणनाअन्तर्गत शुक्लाफाँटा–लालझाडी–जोगबुडा कम्प्लेक्स क्षेत्रमा दुई गुणा दुई किलोमिटरका २६० ग्रिड निर्धारण गरी प्रत्येक सम्भावित क्षेत्रमा एक जोडी स्वचालित क्यामेरा जडान गरिनेछ। क्यामेरा शुक्लाफाँटासँगै लालझाडी–मोहना संरक्षित क्षेत्र र डडेलधुराको जोगबुडामा राखिने जनाइएको छ।
सन् २०२२ को गणनाअनुसार उक्त क्षेत्रमा ३६ वयस्क बाघ रहेको तथ्याङ्क सार्वजनिक भएको थियो। ३०५ वर्गकिलोमिटर क्षेत्रफलमा फैलिएको निकुञ्जमा आहारा प्रजातिको घनत्व उच्च भएकाले बाघको संख्या वृद्धि भएको संरक्षण अधिकृतहरूले बताएका छन्।
