आम जनता पार्टीका तर्फबाट रौतहट जिल्ला क्षेत्र नम्बर ४ का प्रतिनिधिसभा उम्मेदवार ऋषि धमलाले आफ्नो निर्वाचन क्षेत्रका लागि विस्तृत प्रतिबद्धता पत्र सार्वजनिक गरेका छन्। “हरघर मिले रोजगार” मूल नारासहित उनले समग्र विकासको खाका अघि सारेका हुन्।
तीन दशकभन्दा बढी समय पत्रकारितामा सक्रिय धमलाले “रौतहट–४ को उन्नति र प्रगति नै मेरो सपना” उल्लेख गर्दै शिक्षा, स्वास्थ्य, रोजगारी, कृषि, पर्यटन र खेलकुदलाई प्राथमिकतामा राखेका छन्। गरिबीका कारण कुनै विद्यार्थीले पढाइ छोड्न नपरोस् भन्ने उद्देश्यसहित छात्रवृत्ति कार्यक्रम सञ्चालन गर्ने र जेहेन्दार तथा विपन्न विद्यार्थीलाई विशेष सहुलियत उपलब्ध गराउने योजना उनले प्रस्तुत गरेका छन्। मुस्लिम विश्वविद्यालय स्थापनाका लागि पहल गर्ने प्रतिबद्धतासमेत जनाइएको छ।
कृषि क्षेत्र सुदृढीकरणतर्फ उनले जिल्लाका चिनी उद्योगसँग समन्वय गरी उखु किसानलाई उचित मूल्य सुनिश्चित गर्ने, सहुलियत दरमा कृषि ऋण उपलब्ध गराउने तथा सिँचाइ आयोजनालाई पूर्णता दिने कार्यक्रम अघि सारेका छन्। साथै, ‘एक घर, एक धारा’ अभियानमार्फत स्वच्छ खानेपानी उपलब्ध गराउने र रौतहटमै स्तरीय अस्पताल स्थापना गर्ने योजना पनि सार्वजनिक गरिएको छ।
धार्मिक तथा ऐतिहासिक सम्पदाको संरक्षण–प्रवर्द्धन गर्दै आन्तरिक पर्यटन विस्तार गर्ने, साथै महिला फुटबलका लागि परिचित रौतहटमा आधुनिक खेलकुद पूर्वाधार निर्माण गर्ने प्रतिबद्धता उनले व्यक्त गरेका छन्।
उम्मेदवार धमलाले प्रतिबद्धता पत्रमार्फत क्षेत्रको समग्र विकासका लागि आफू प्रतिबद्ध रहेको जनाउँदै मतदातासँग समर्थनको अपिल गरेका छन्।
