१६ फागुन, काठमाडौं। गत भदौमा भएको ‘जेनजी आन्दोलन’ सम्बन्धी BBC ले निर्माण गरेको डकुमेन्ट्री जनकपुरमा सार्वजनिक रूपमा प्रदर्शन गरेको आरोपमा राष्ट्रिय स्वतन्त्र पार्टी (रास्वपा) का एक कार्यकर्ता गाडीसहित पक्राउ परेका छन्।
जिल्ला प्रहरी कार्यालय धनुषाका प्रवक्ता डीएसपी गणेश बमका अनुसार भारतीय नम्बर प्लेट BR 01 G 01467 भएको सवारीसाधनमा प्रोजेक्टर जडान गरी जनकपुरस्थित रेल्वे स्टेसन अगाडि डकुमेन्ट्री प्रसारण भइरहेको अवस्थामा प्रहरीले विकास जयसवाललाई नियन्त्रणमा लिएको हो।
प्रहरीका अनुसार घटनास्थलमा रहेका थप दुई सवारीसाधन भने फरार भएका छन्। धनुषाका प्रहरी उपरीक्षक रुगमबहादुर कुँवरले ती गाडीहरू पनि प्रोजेक्टरसहित डकुमेन्ट्री प्रदर्शनका लागि ल्याइएको प्रारम्भिक जानकारी प्राप्त भएको बताएका छन्।
घटनाबारे थप अनुसन्धान भइरहेको प्रहरीले जनाएको छ।
