दमौली: तनहुँ क्षेत्र नम्बर १ मा चुनावी सरगर्मी तीव्र भइरहेका बेला स्वतन्त्र उम्मेदवार सन्देश लौडारीले आफ्नो उम्मेदवारी फिर्ता लिँदै नेपाली कांग्रेसका उम्मेदवार गोविन्द भट्टराईलाई समर्थन गर्ने घोषणा गरेका छन्।
आइतबार साँझ दमौलीमा आयोजित विशेष कार्यक्रममा लौडारीको नेतृत्वमा दुई सयभन्दा बढी युवाहरू औपचारिक रूपमा नेपाली कांग्रेस मा प्रवेश गरेका हुन्।
कार्यक्रममा बोल्दै लौडारीले कुनै पनि प्रकारको अवसरवादभन्दा माथि उठेर इमानदार र सक्षम नेतृत्वलाई साथ दिनु आजको आवश्यकता भएको महसुस गर्दै आफू कांग्रेसमा आबद्ध भएको बताए। उनले मुलुकमा सकारात्मक परिवर्तनका लागि स्पष्ट दृष्टिकोण भएका नेतृत्वलाई समर्थन गर्नु आफ्नो जिम्मेवारी ठानेको उल्लेख गरे।
नवप्रवेशी युवाहरूलाई स्वागत गर्दै कांग्रेस उम्मेदवार गोविन्द भट्टराई ले आफू नेपाल विद्यार्थी संघ को केन्द्रीय अध्यक्ष हुँदाको समय स्मरण गरे। उनले सधैँ युवा पुस्ताको भावना बुझ्दै उनीहरूको प्रतिनिधित्व गर्ने प्रयास गरेको दाबी गरे।
भट्टराईले वर्तमान सभापति गगनकुमार थापा युवा अवस्थामै नेतृत्वमा आउँदा आफूले नेविसंघको टिकट दिएर अगाडि बढाएको प्रसङ्ग उल्लेख गर्दै युवालाई नेतृत्वमा स्थापित गर्न आफ्नो सधैँ महत्वपूर्ण भूमिका रहने बताए।
आफू युवा अवस्थादेखि नै भ्रष्टाचारविरुद्धको अभियानमा सक्रिय रहेको बताउँदै भट्टराईले नयाँ पुस्ताको मुख्य माग सुशासन, भ्रष्टाचारको अन्त्य र स्वदेशमै रोजगारी सिर्जना गर्नु रहेको धारणा राखे। ती विषयलाई नै प्राथमिकतामा राखेर अगाडि बढ्ने उनले प्रतिबद्धता व्यक्त गरे।
