चन्द्र पन्त निर्देशित ‘आबाट आमा’ २०८२ सालमा दोस्रो धेरै कमाउने नेपाली फिल्म बनेको छ। मंगलबार मध्यान्हसम्म फिल्मले १२ करोड ३९ लाख ८९ हजार २३ रुपैयाँ ग्रस कलेक्सन गरेको छ। यही अवधिमा ४ लाख ६९ हजार ४१४ टिकट बिक्री भएको जनाइएको छ।
यसले जेरी अन टप (अनमोल केसी अभिनीत) को १२ करोड २६ लाख ६ हजार २४० रुपैयाँ ग्रस कमाइलाई समेत पछि पारेको छ।
तर, यो उपलब्धिसँगै पनि ‘आबाट आमा’ अभिनेता पल शाहको करिअरकै सर्वाधिक कमाउने फिल्म भने बनेको छैन। उनको अघिल्लो फिल्म शत्रु गते ले १२ करोड ६५ लाख ८२ हजार १३५ रुपैयाँ ग्रस कमाएको थियो।
मल्टिस्टारर ‘आबाट आमा’मा विपना थापा, प्रदीप रावत, सिम्रन पन्त, उषा उप्रेती र साइग्रेस पोखरेलको अभिनय रहेको छ। निर्माता पक्षले फिल्मको दोस्रो श्रृंखला निर्माण गर्ने घोषणा गरिसकेको छ।
२०८२ सालमा सर्वाधिक कमाउने नेपाली फिल्म भने परान हो, जसले १७ करोड ८४ लाख ४७ हजार ५७६ रुपैयाँ ग्रस कमाएको छ। साथै, ऊनको स्विटर ले पनि १० करोड रुपैयाँभन्दा बढी व्यापार गर्न सफल भएको छ।
