खोटाङबाट प्रतिनिधिसभा सदस्यमा श्रम संस्कृति पार्टीका महासचिव आरेन राई निर्वाचित भएका छन्। उनले **नेपाल कम्युनिस्ट पार्टी (एमाले)**का उम्मेदवार देवबिक्रम राईलाई ३,८९८ मतान्तरले पराजित गरेका हुन्।
मुख्य निर्वाचन अधिकृतको कार्यालयका अनुसार आरेन राईले १६,६१२ मत प्राप्त गर्दा देवबिक्रम राईले १२,७१४ मत पाए। केपिलासगढी गाउँपालिका–१, फेदीस्थित सुङ्देका आरेन राईले नवोदित श्रम संस्कृति पार्टीबाट उम्मेदवारी दिँदै पुराना दलका उम्मेदवारलाई पछि पार्दै विजय हासिल गरेका हुन्।
यसैगरी नेपाली कांग्रेसका वीरकाजी राईले ११,९५७, **नेपाल कम्युनिस्ट पार्टी (नेकपा)**का डा. हरि रोकाले ९,४४३, **राष्ट्रिय स्वतन्त्र पार्टी (रास्वपा)**का रुद्र गिरीले ५,७०४ र राष्ट्रिय परिवर्तन पार्टीका मिरेश राईले ९४७ मत प्राप्त गरेका छन्।
अन्य उम्मेदवारमध्ये **जनता समाजवादी पार्टी (जसपा)**का राकेश राईले ३३७, **राष्ट्रिय प्रजातन्त्र पार्टी (राप्रपा)**का दीपक तामाङले ४७७, **नेकपा (माओवादी)**का चन्द्रबहादुर बुढाथोकीले १८२, **जसपा (नेपाल)**का सुनिल चाम्लिङले १११, मंगोल नेशनल अर्गनाइजेसनका प्रयाग राईले ३२, मितेरी पार्टी नेपालका केशरमान चाम्लिङले २६ र नेपाल मजदुर किसान पार्टीका ध्यानप्रसाद ढकालले २६ मत प्राप्त गरेका छन्।
स्वतन्त्र उम्मेदवार डा. राजकुमार राईले २६ र तीलकचन्द्र राईले ४३ मत प्राप्त गरेको मुख्य निर्वाचन अधिकृत एवं जिल्ला न्यायाधीश फणिन्द्रप्रसाद पराजुलीले जानकारी दिएका छन्।
प्रतिनिधिसभातर्फ एकमात्र निर्वाचन क्षेत्र रहेको खोटाङमा कुल १,४७,१२० मतदातामध्ये ६२,५६६ मत खसेको थियो। प्रत्यक्षतर्फ खसेको मतमध्ये ३,९२८ मत बदर भएको जिल्ला निर्वाचन कार्यालय खोटाङका प्रमुख रविन मगरले जानकारी दिएका छन्।
प्रत्यक्षतर्फको मतगणना सकिएलगत्तै समानुपातिकतर्फको मतगणना सुरु गरिएको छ।
