ललितपुर–२ मा जगदीश खरेलको शानदार जित, खरेलले भने : यो समग्र ललितपुरको जित हो

प्रतिनिधिसभा सदस्य निर्वाचनअन्तर्गत ललितपुर निर्वाचन क्षेत्र नम्बर–२ बाट राष्ट्रिय स्वतन्त्र पार्टी (रास्वपा) का उम्मेदवार जगदीश खरेल विजयी भएका छन्।

आइतबार सार्वजनिक अन्तिम मतपरिणामअनुसार खरेलले ३९ हजार ४ सय ९१ मत प्राप्त गर्दै प्रतिस्पर्धी उम्मेदवारहरूलाई पछि पार्दै विजय हासिल गरेका हुन्।

विजयपछि सञ्चारकर्मीसँग कुरा गर्दै खरेलले सम्पूर्ण मतदाताप्रति आभार व्यक्त गरेका छन्। उनले यो जित ललितपुर–२ को मात्र नभई समग्र ललितपुर र देशकै जित भएको बताएका छन्।

खरेलले भने, “सम्पूर्ण जनताप्रति धन्यवाद व्यक्त गर्न चाहन्छु। यो जित ललितपुर क्षेत्र नम्बर–२ को मात्र होइन, समग्र ललितपुरको जित हो। हामीले यसलाई देश र जनताको जितका रूपमा लिएका छौँ, पार्टीको मात्र जितका रूपमा होइन।”

उनले अब देश निर्माण र विकासको अभियानलाई अगाडि बढाउने प्रतिबद्धता पनि व्यक्त गरेका छन्। खरेलले पार्टी सभापति रवि लामिछाने तथा वरिष्ठ नेता एवं भावी प्रधानमन्त्रीका रूपमा उल्लेख गरिएका बालेन शाहको नेतृत्वमा देशलाई विकास र समृद्धिको बाटोतर्फ अघि बढाउने अभियान जारी रहने बताए।

उनले भने, “अब हामीले देश बनाउनुपर्छ। यो अभियानमा पार्टी सभापति रवि लामिछाने, वरिष्ठ नेता तथा भावी प्रधानमन्त्री बालेन शाहको नेतृत्वमा हामी सबै राष्ट्रिय स्वतन्त्र पार्टी देश र जनतालाई विकास र समृद्धिको बाटोमा अघि बढाउनेछौँ। यसमा साथ दिनु भएकोमा सबैलाई धन्यवाद।”

उनले निर्वाचनमा साथ र समर्थन गर्ने सम्पूर्ण मतदाताप्रति पुनः धन्यवाद व्यक्त गरेका छन्।