प्रतिनिधिसभा सदस्य निर्वाचनको जारी मतगणनामा राष्ट्रिय स्वतन्त्र पार्टी (रास्वपा) ले उल्लेखनीय अग्रता कायम गरेको छ। हालसम्म सार्वजनिक नतिजाअनुसार रास्वपाका १२० उम्मेदवार विजयी भएका छन्।
आज साँझ ५ बजेसम्मको मतपरिणामअनुसार रास्वपाका उम्मेदवारहरू थप ६ निर्वाचन क्षेत्रमा अग्रतामा रहेका छन्।
निर्वाचन आयोगका अनुसार हालसम्म १५६ स्थानको मतगणना सार्वजनिक भइसकेको छ। तीमध्ये नेपाली कांग्रेसले १७ क्षेत्रमा विजय हासिल गरेको छ। नेकपा (एमाले) ले ७ स्थानमा जित हासिल गरेको छ भने थप ३ स्थानमा अग्रता कायम गरेको छ।
यसैगरी, नेपाली कम्युनिष्ट पार्टी (नेकपा) का तर्फबाट हालसम्म ७ उम्मेदवार विजयी भएका छन्। श्रम संस्कृति पार्टीका ३ जना उम्मेदवार विजयी भएका छन् भने राष्ट्रिय प्रजातन्त्र पार्टी (राप्रपा) र स्वतन्त्र उम्मेदवार १–१ स्थानमा विजयी भएका छन्।
प्रतिनिधिसभा सदस्यको फागुन २१ गते सम्पन्न समानुपातिक निर्वाचनतर्फ हालसम्म ४५ लाख ३० हजार ९१३ मतगणना सम्पन्न भएको छ।
जसअनुसार रास्वपाले २२ लाख ३९ हजार ८७० मत प्राप्त गरेको छ। नेपाली कांग्रेसले ७ लाख ६० हजार ४८५ मत, एमालेले ६ लाख ४६ हजार ७७० मत र नेकपाले ३ लाख ४ हजार ६२ मत प्राप्त गरेका छन्।
त्यसैगरी, राप्रपाले १ लाख ६३ हजार १५१ मत प्राप्त गरेको छ भने श्रम संस्कृति पार्टीले १ लाख ७ हजार ३२ मत प्राप्त गरेको निर्वाचन आयोगले जनाएको छ।
