राष्ट्रिय स्वतन्त्र पार्टी (रास्वपा) ले आगामी सरकारमा सहभागी हुने मन्त्रीहरूको नामबारे हालसम्म कुनै औपचारिक छलफल नभएको स्पष्ट पारेको छ।
पार्टीका प्रवक्ता मनिष झाले सञ्चारमाध्यमसँग कुरा गर्दै अहिले विभिन्न माध्यममा सार्वजनिक भइरहेका सम्भावित मन्त्रीका नामहरूमा सत्यता नभएको बताएका हुन्। उनले पार्टीको सचिवालय बैठक सुरु हुनुअघि यस्तो प्रतिक्रिया दिएका थिए।
उनका अनुसार समानुपातिकतर्फका सांसदहरूको टुंगो लागेर निर्वाचन आयोग बाट प्रमाणपत्र प्राप्त भएपछि मात्रै मन्त्री चयनबारे औपचारिक छलफल सुरु हुनेछ।
झाले भने, “अनौपचारिक कुराकानीहरू हुन सक्छन्, तर पार्टीको तहमा भावी मन्त्रिपरिषद् गठनका विषयमा कुनै औपचारिक छलफल भएको छैन। सबै प्रक्रिया पूरा भएपछि नयाँ सरकार गठन गर्न अझै करिब १० दिनजति लाग्न सक्छ।”
उनले आफू पुनः निर्वाचित सांसदमध्ये एक भएकाले स्वाभाविक रूपमा केही अपेक्षा भए पनि कुनै मन्त्रालयगत दाबी नराखेको बताए। उनका अनुसार अहिले आफूले कुनै मन्त्रालयको दाबी गर्नु राजनीतिक तथा व्यवहारिक दुवै हिसाबले उचित नहुने ठानेको बताएका छन्।
“मेरो चाहना भनेको नेताहरूको स्वास्थ्य शीघ्र सुधार होस् भन्ने मात्र हो। अहिले सबै प्रक्रिया चाँडै टुंग्याएर सरकार गठनको बाटो खुलोस् भन्नेमा हाम्रो ध्यान केन्द्रित छ,” उनले भने।
चुनावी अभियानका क्रममा भने झाले आफूलाई सम्भावित सञ्चारमन्त्रीका रूपमा प्रस्तुत गरेका थिए।
