काठमाडौं उपत्यकामा ट्राफिक प्रहरीले राइड सेयरिङ सवारी साधनमाथि विशेष चेकिङ अभियान सञ्चालन गर्दै १७५ चालकलाई कारबाही गरेको छ।
काठमाडौं उपत्यका ट्राफिक प्रहरी कार्यालयले आइतबार उपत्यकाका विभिन्न स्थानमा उक्त अभियान सञ्चालन गरेको हो। अभियानका क्रममा नियमविपरीत सञ्चालन भइरहेका सवारी साधनमाथि निगरानी कडाइका साथ बढाइएको थियो।
प्रहरीका अनुसार कारबाहीका प्रमुख कारणमा अनलाइन अनुमति नलिई अफलाइन रूपमा सवारी सञ्चालन गर्नु, जथाभावी पिक एन्ड ड्रप गर्नु तथा सवारी साधन मापदण्डअनुसार नहुनु रहेका छन्।
यस्ता गतिविधिले सडक सुरक्षा तथा यातायात व्यवस्थापनमा नकारात्मक असर पार्ने भएकाले कडाइका साथ अनुगमन र कारबाही गरिएको ट्राफिक प्रहरीले जनाएको छ।
ट्राफिक प्रहरीले सबै सवारी चालकलाई नियमअनुसार सवारी सञ्चालन गर्न, ट्राफिक नियमको पालना गर्न तथा दुर्घटना न्यूनीकरणमा सहयोग गर्न आग्रह गरेको छ। साथै, सुरक्षित र व्यवस्थित यातायात प्रणाली निर्माणका लागि सबैको सहकार्य आवश्यक रहेको पनि उल्लेख गरेको छ।
