नेपालमा Toyota गाडीको बिक्री बर्सेनी बढ्दै गएको छ। नेपालका लागि टोयोटा ब्रान्डको आधिकारिक बिक्रेता United Traders Syndicate ले चालु आर्थिक वर्षको पहिलो ६ महिनामै १८ करोड २० लाख रुपैयाँ खुद नाफा कमाएको छ।
कम्पनीले सो अवधिमा ३ अर्ब ३९ करोड ५० लाख रुपैयाँको व्यापार गरेको जनाएको छ। गत आर्थिक वर्ष (सन् २०२५) मा कम्पनीले ५ अर्ब ५० करोड २० लाख रुपैयाँको कारोबार गरेको थियो भने सन् २०२४ मा ३ अर्ब २४ करोड रुपैयाँको व्यापार भएको थियो। व्यापारमा निरन्तर वृद्धि देखिएकाले चालु वर्षमा पनि उच्च वृद्धि हुने अपेक्षा गरिएको छ।
प्यासेन्जर तथा कमर्सियल दुवै प्रकारका सवारी साधनको माग बढ्दा कम्पनीको व्यापार विस्तार भएको हो। गत आर्थिक वर्षमा कम्पनीले २४ करोड ३० लाख रुपैयाँ खुद नाफा कमाएको थियो भने सन् २०२४ मा ७ करोड ४० लाख रुपैयाँ मात्र नाफा कमाएको थियो।
कम्पनीको कुल ऋण गत वर्ष १ अर्ब ४९ करोड ८० लाख रुपैयाँ रहेको थियो। ऋणका बाबजुद पनि व्यापार विस्तार सकारात्मक रहेको र बाह्य ऋणमा सीमित निर्भरता रहेको मूल्याङ्कन गरिएको छ।
सन् १९७१ मा स्थापना भएको युनाइटेड ट्रेडर्स सिन्डिकेटले सन् १९६७ देखि नै टोयोटा ब्रान्डका सवारी साधन, स्पेयर पार्ट्स तथा सेवा उपलब्ध गराउँदै आएको छ। हाल कम्पनीका देशभर १० प्रमुख सहर—काठमाडौं, ललितपुर, पोखरा, चितवन, बुटवल, विराटनगर, जनकपुर, धनगढी, नेपालगञ्ज र झापामा डिलर सञ्जाल रहेको छ।
त्यसैगरी, कम्पनीका तीन वटा आफ्नै शोरुम रहेका छन्, जसमा एउटा सवारी साधनका लागि र दुई वटा स्पेयर पार्ट्सका लागि सञ्चालनमा छन्।
कम्पनीमा Suraj Vaidya को ५० प्रतिशत, रितुसिंह वैद्यको ३० प्रतिशत, सुर्यान्स वैद्यको १० प्रतिशत र सुसन वैद्य श्रेष्ठको १० प्रतिशत स्वामित्व रहेको छ। कम्पनीले दीर्घकालीन तथा अल्पकालीन कर्जाका लागि कुल २ अर्ब ९७ करोड ३८ लाख रुपैयाँ बराबरको रेटिङ गराएको छ।
