देवदह (रुपन्देही), चैत २४ — रुपन्देहीको भैरहवास्थित गौतमबुद्ध अन्तर्राष्ट्रिय विमानस्थललाई यथाशीघ्र सञ्चालनमा ल्याउन सिद्धार्थनगर नगरपालिकाका जनप्रतिनिधिहरूले सरकारसँग माग गरेका छन्। सोमबार भैरहवामा आयोजित सिद्धार्थनगर नगरपालिकाको प्रशासनिक भवन उद्घाटन समारोहमा उनीहरूले सङ्घीय सरकारसँग यस्तो आग्रह गरेका हुन्।
समारोहमा नगरप्रमुख इश्तियाक अहमद खाँले अर्बौं रुपैयाँ लगानीमा निर्माण भएको उक्त विमानस्थल छिटो सञ्चालन गर्नुपर्नेमा जोड दिनुभयो। उहाँले भगवान् गौतमबुद्धको नामबाट निर्माण गरिएको विमानस्थल सञ्चालनमा आए देशको आर्थिक गतिविधि थप गतिशील हुने विश्वास व्यक्त गर्नुभयो।
उहाँका अनुसार लुम्बिनीको विकासले समग्र मुलुकको आर्थिक गतिविधिलाई चलायमान बनाउनुका साथै पर्यटन प्रवर्द्धनमा महत्वपूर्ण योगदान पुर्याउँछ। “विमानस्थल नियमित सञ्चालनमा आए भैरहवामात्र होइन, समग्र देशकै विकासमा टेवा पुग्छ र पर्यटकको आवागमनसमेत वृद्धि हुन्छ,” उहाँले भन्नुभयो। साथै, उहाँले विमानस्थल सञ्चालनमा ढिलाइ गर्न नहुनेमा पनि जोड दिनुभयो।
नगर प्रवक्ता मुक्तिनाथ यादवले विमानस्थल सञ्चालन नहुँदा यस क्षेत्रका उद्योगी–व्यवसायीहरू गम्भीर समस्यामा परेको उल्लेख गर्नुभयो। उहाँले आवश्यक पहल गरी विमानस्थल सञ्चालनमा ल्याउन वर्तमान सरकारसँग माग गर्नुभयो। साथै, सिद्धार्थनगर नगरपालिका–४ का वडाअध्यक्षसमेत रहनुभएका यादवले स्थानीय सरकारको तर्फबाट पनि यस विषयमा पहल जारी रहने बताउनुभयो।
