काठमाडौँ — प्रधानमन्त्री कप एकदिवसीय क्रिकेट प्रतियोगिताअन्तर्गत आज (चैत २५) दुई खेल हुँदैछन्। पहिलो खेलमा वाग्मती प्रदेश र कोसी प्रदेशबीच प्रतिस्पर्धा हुनेछ।
वाग्मती प्रदेश तेस्रो जितको खोजीमा मैदान उत्रनेछ। हाल तालिकाको सातौँ स्थानमा रहेको वाग्मतीले ६ खेलमा दुई जित र चार हारसहित ४ अंक जोडेको छ।
कोसी प्रदेश भने पहिलो जित निकाल्ने लक्ष्यमा छ। तालिकाको पुछारमा रहेको कोसीले ६ खेलमा पाँच हार व्यहोर्दै १ अंक मात्र जोडेको छ भने एक खेल रद्द भएको थियो।
यी दुई टोलीबीचको खेल जनकपुरस्थित रामजानकी बहुद्देश्यीय रंगशालामा बिहान ९:३० बजे सुरु हुनेछ।
आजै हुने दोस्रो खेलमा गण्डकी प्रदेशले मधेस प्रदेशको सामना गर्नेछ।
गण्डकी प्रदेश तेस्रो जितको खोजीमा हुनेछ। तालिकाको छैटौँ स्थानमा रहेको गण्डकीले ६ खेलमा दुई जित, तीन हार र एक खेल रद्द हुँदा ५ अंक जोडेको छ।
मधेस प्रदेश भने चौथो जित निकाल्ने लक्ष्यमा मैदानमा उत्रनेछ। तालिकाको पाँचौँ स्थानमा रहेको मधेसले ५ खेलमा तीन जित, एक हार र एक खेल रद्द हुँदै ७ अंक जोडेको छ।
यी दुईबीचको खेल वीरगञ्जस्थित नारायणी क्रिकेट मैदानमा बिहान ९:३० बजे सुरु हुनेछ।
