इटहरी । कोशी प्रदेशमा नक्कली नम्बर प्लेट जडान गरी सवारी सञ्चालन गर्ने प्रवृत्ति अझै सक्रिय रहेको संकेत देखिएको छ। इटहरी क्षेत्रमा प्रहरीले चार वटा सवारी नियन्त्रणमा लिएको छ। राजमार्ग सुरक्षा तथा ट्राफिक व्यवस्थापन कार्यालय इटहरीको संयुक्त चेकिङ अभियानका क्रममा ती सवारी विभिन्न स्थानबाट फेला परेका हुन्।
विशेष सूचनाका आधारमा गरिएको निगरानीका क्रममा टाटा पन्च, महेन्द्रा बोलेरो पिकअप, हुण्डाईको निजी कार र भारतीय मारुती सुजुकी कार बरामद गरिएको प्रहरीले जनाएको छ। प्रारम्भिक जाँचमै ती सवारीमा आवश्यक कागजात अभावसँगै नक्कली नेपाली नम्बर प्लेट प्रयोग गरिएको पुष्टि भएपछि थप अनुसन्धानका लागि भन्सार कार्यालयमा बुझाइएको छ।
प्रहरीका अनुसार एउटा सवारी इटहरी चौकबाट फेला परेको हो भने अर्को लौकही क्षेत्रबाट बरामद गरिएको हो। त्यस्तै, बिर्तामोड र चन्द्रगढी क्षेत्रबाट समेत सवारी फेला परेका छन्। सबै सवारी परित्यक्त अवस्थामा भेटिएकाले चालक वा धनीको पहिचान हुन सकेको छैन।
ट्राफिक प्रहरी उपरीक्षक दीपक गिरीका अनुसार यस्ता सवारी भारतबाट अवैध रूपमा भित्र्याइएका वा चोरीका हुन सक्ने आशंका रहेको छ। नक्कली नम्बर प्लेट जडान गरेर सञ्चालन गरिनुले संगठित गिरोहको संलग्नता रहेको संकेत देखिएको उहाँको भनाइ छ।
प्रहरीका अनुसार पछिल्लो समय सीमावर्ती नाकाबाट सवारी तस्करी गरी नेपाल भित्र्याउने र त्यसपछि नक्कली नम्बर प्लेट प्रयोग गर्ने प्रवृत्ति बढ्दो छ। यसले सवारी चोरी, कर छली तथा अन्य आपराधिक गतिविधि सहज बनाउने जोखिम बढाएको छ।
ट्राफिक प्रहरी नायव उपरीक्षक सन्तोष श्रेष्ठले भन्सारमार्फत सवारीको वास्तविक स्वामित्व, उत्पत्ति र कागजातको प्रामाणिकता जाँच गरी कानुनी प्रक्रिया अघि बढाइने जानकारी दिनुभयो।
प्रहरीले नागरिकलाई सवारी किनबेच गर्दा कागजातको यकिन गर्न तथा शंकास्पद सवारी देखिएमा तत्काल जानकारी गराउन आग्रह गरेको छ।
