काठमाडौँ – सुदूरपश्चिमको विकासका प्रमुख चुनौती र सम्भावनाबारे छलफल गर्न सुदूरपश्चिमाञ्चल सरोकार मञ्चले सेमिनार आयोजना गर्ने भएको छ।
मञ्चको शनिबार काठमाडौंमा सम्पन्न कार्यसमिति बैठकले यससम्बन्धी निर्णय गरेको हो।
हालै सम्पन्न निर्वाचनमा सुदूरपश्चिम प्रदेशबाट निर्वाचित प्रतिनिधिसभा सदस्यहरूलाई शुभकामना व्यक्त गर्दै प्रदेशको विकासका चुनौतीबारे बुँदागत रूपमा प्रस्तुति गर्न सेमिनार आयोजना गर्ने निर्णय गरिएको मञ्चका कार्यसमिति सदस्य रवि धामीले जानकारी दिए। प्रदेशका सबै सांसदलाई सहभागी गराएर कार्यक्रम गरिनेछ।
अध्यक्ष दीर्घसिंह बमको अध्यक्षतामा बसेको बैठकले सुदूरपश्चिमसँग सम्बन्धित काठमाडौंमा रहेका संघ–संस्थाहरूसँग सहकार्य र समन्वय गर्ने पनि निर्णय गरेको छ।
बैठकले मञ्चका सदस्य डा. गुणाकर भट्ट राष्ट्रिय योजना आयोगको उपाध्यक्ष पदमा नियुक्त भएकोमा बधाई ज्ञापन गर्दै सुदूरपश्चिमको विकासमा उनले महत्वपूर्ण भूमिका निर्वाह गर्ने विश्वास व्यक्त गरेको छ। साथै, मञ्चको कोषाध्यक्षमा हेमा भट्टलाई मनोनयन गरिएको छ।
