काठमाडौँ – नेपाली कम्युनिस्ट पार्टीका सहसंयोजक तथा पूर्वप्रधानमन्त्री माधवकुमार नेपालले पार्टीको संगठनात्मक एकीकरणको बाँकी काम एक हप्ताभित्रै सम्पन्न गर्ने तयारी भइरहेको बताएका छन्।
अखिल नेपाल महिला सङ्घ (क्रान्तिकारी) को सम्पर्क समन्वय प्रदेश कमिटीद्वारा नयाँ वर्षको अवसरमा आयोजित क्यालेन्डर विमोचन कार्यक्रममा बोल्दै उनले यस्तो बताएका हुन्।
नेता नेपालले निर्वाचनको परिणाम अपेक्षाभन्दा फरक आएको स्वीकार गर्दै त्यसको गम्भीर समीक्षा गर्नुपर्नेमा जोड दिए। उनले कार्यकर्ताको सक्रियता र इमान्दारितामाथि प्रश्न उठाउँदै आत्ममन्थन आवश्यक रहेको बताए।
पार्टीभित्र हाल ४५ सदस्यीय केन्द्रीय समन्वय समितिको बैठक सात दिनदेखि जारी रहेको जानकारी दिँदै उनले राष्ट्रिय समस्या, राजनीतिक सङ्कट र कम्युनिस्ट आन्दोलनका चुनौतीबारे छलफल भइरहेको बताए।
नेपालको राजनीतिमा कम्युनिस्टहरूले २००७ सालदेखि महत्वपूर्ण भूमिका खेलेको स्मरण गर्दै उनले कम्युनिस्टहरू सच्चा देशभक्त भएको दाबी गरे। साथै, महिला हिंसा, दलितमाथिको अत्याचार र गरिबीविरुद्ध संघर्ष गर्न महिला संगठनलाई सक्रिय हुन निर्देशन दिए।
महिलाहरूले स्थानीयदेखि राष्ट्रिय समस्यासम्म ध्यान दिनुपर्ने उल्लेख गर्दै उनले एकतामात्र पर्याप्त नहुने, शक्ति विस्तार गर्दै जनताको मन जित्न आफ्नै खुट्टामा उभिनुपर्ने आवश्यकता औँल्याए।
