कैलाली र बर्दिया जिल्ला जोड्ने कर्णाली नदीस्थित सनकट्टी घाटमा निर्माणाधीन पुल अन्तिम चरणमा पुगेको छ। पुल निर्माण सम्पन्न भएसँगै कैलाली–बर्दिया आवतजावत सहज हुने अपेक्षा गरिएको छ।
निर्माण कम्पनीका इञ्जिनियर धिरेन्द्र सहनीका अनुसार विक्रम संवत् २०८३ असोज १७ गतेसम्म सम्पन्न गर्ने सम्झौता भए पनि निर्धारित समयअगावै काम सक्ने लक्ष्यसहित निर्माण भइरहेको छ। “२०७९ पुसमा सम्झौता भई २०८० मा निर्माण सुरु गरिएको हो,” उनले भने, “असोजसम्मको म्याद भए पनि असारभित्रै काम सम्पन्न गरी सरकारलाई हस्तान्तरण गर्ने तयारी छ।”
चौध वटा पिलर रहेको पुलका सबै पिलर निर्माण भइसकेका छन् भने हाल १२औँ स्पानको काम भइरहेको छ। आगामी १५ दिनभित्र उक्त काम सकी १३औँ स्पानको काम सुरु गर्ने तयारी छ। कैलालीतर्फ तटबन्ध निर्माण पनि सँगसँगै भइरहेको छ।
पुल निर्माण अन्तिम चरणमा पुगेसँगै स्थानीयवासीले आंशिक रूपमा पुल र आंशिक रूपमा नदीको बाटो प्रयोग गरी आवतजावत गर्न थालेका छन्। नदीमा डाइभर्सन गरिएको कारण डुङ्गाबाट यात्रा गर्नुपर्ने बाध्यता हट्दै गएको छ।
स्थानीयवासीका अनुसार पुल सञ्चालनमा आएपछि कैलाली र बर्दियाबीचको यात्रा सहज मात्र नभई दूरी पनि करिब २० किलोमिटरले घट्नेछ। खेतीपाती, व्यापार तथा उपचारका लागि आवतजावत गर्ने दुवै जिल्लाका बासिन्दालाई ठूलो राहत पुग्ने अपेक्षा गरिएको छ।
रु १ अर्ब १८ करोड लागतमा निर्माण भइरहेको उक्त पुलको लम्बाइ ७५२ मिटर र चौडाइ ११ मिटर रहेको छ। पुलसँगै दुवैतर्फ ५०० मिटर पहुँच मार्ग र करिब १ हजार १५ मिटर नदी नियन्त्रणको काम पनि भइरहेको छ।
यसअघि स्थानीयले चिसापानीस्थित कर्णाली पुल र सत्तीघाट पुल प्रयोग गर्दै आएका थिए। सनकट्टी घाट पुल सञ्चालनमा आएपछि कर्णाली नदीमा कैलाली–बर्दिया जोड्ने पुलको संख्या तीन पुग्नेछ।
स्थानीयवासीले वर्षायामअघि नै पुल पूर्ण रूपमा सञ्चालनमा ल्याउन सम्बन्धित निकायसँग आग्रह गरेका छन्।
